കൊച്ചി : കോറോ ഹെല്ത്തിലെ കൂട്ടപ്പിരിച്ചുവിടലില് കമ്പനി ഇന്നും ധാരണ പാലിച്ചില്ല. രാവിലെ ജോലിക്കെത്തിയ ജീവനക്കാര് പുറത്ത് കാത്തുനില്ക്കുകയാണ്. അതേസമയം സ്ഥലത്ത് തൊഴില് വകുപ്പ് ഉദ്യോഗസ്ഥര് എത്തി ജീവനക്കാരുടെ ഹാജര് രേഖപ്പെടുത്തി. രാവിലെ ജോലിക്കെത്തിയ ജീവനക്കാരെ ആരെയും അകത്തേക്ക് കയറ്റിവിട്ടില്ല. കമ്പനിയുടെ ഉദ്യോഗസ്ഥര് ഇവിടെ എത്തിയിട്ടുണ്ട്. പക്ഷേ അകത്തേക്ക് കയറാന് കഴിയാതെ പുറത്തു തുടരുകയാണ്. പിരിച്ചുവിട്ട ജീവനക്കാരെ ഇന്നലെയും ഇന്നും അകത്ത് കയറ്റിയിട്ടില്ല. തങ്ങള്ക്ക് ഓഫീസില് കയറാനും ബാത്റൂം ഉള്പ്പെടെയുള്ള സൗകര്യങ്ങള് ഉപയോഗിക്കാനും അനുമതി നല്കുമെന്നാണ് പറഞ്ഞിരുന്നതെന്ന് തൊഴിലാളികള് പറയുന്നു.
എന്നാല് ഓഫീസ് പൂട്ടിയിട്ടിരിക്കുകയാണ്. തൊഴിലാളികള് സര്ക്കാര് തലത്തിലുള്ള ചര്ച്ചകള്ക്കായി കാത്തിരിക്കുകയാണ്. വെള്ളിയാഴ്ചയാണ് ചര്ച്ച. അനുകൂലമായ തീരുമാനമുണ്ടാകുമെന്നാണ് ഇവരുടെ പ്രതീക്ഷ. കോറോ ഹെല്ത്തിലേക്ക് രാവിലെ എഐവൈഎഫ് മാര്ച്ച് നടത്തി. തൊഴില് നിയമങ്ങള് കാറ്റില്പ്പറത്തി മുന്നോട്ട് പോകാമെന്ന് കരുതേണ്ടെന്ന് നേതാക്കള് മുന്നറിയിപ്പ് നല്കി.
