കൊല്ലം : ബൈപ്പാസില് കാര് ലോറിയിലേക്ക് ഇടിച്ചു കയറി നോര്ത്ത് പറവൂര് സ്വദേശികളായ ഷമീര് (28), ഫാത്തിമ (26) എന്നിവര്ക്ക് ഗുരുതരമായി പരിക്കേറ്റു. ഇന്നലെ വൈകിട്ട് 5.30 ന് മങ്ങാട് ക്ഷേത്രത്തിന് സമീപമായിരുന്നു അപകടം. നോര്ത്ത് പറവൂരില് കോണ്ട്രാക്ടറായ ഷമീര് ബില്ല് മാറാനായി തിരുവനന്തപുരത്തെ പി.ഡബ്ല്യു.ഡി ഓഫീസില് പോയി മടങ്ങവേ കടവൂരില് നിന്ന് കല്ലുംതാഴത്തേക്ക് പോയ ലോറിയുമായി ഇടിക്കുകയായിരുന്നു. ഷമീര് ഉറങ്ങിയതാകാം അപകട കാരണമെന്നാണ് പ്രാഥമിക നിഗമനം.
കാര് ലോറിക്കടിയിലേക്ക് ഇടിച്ചു കയറുകയായിരുന്നു. കല്ലുംതാഴത്തേക്ക് പോകുകയായിരുന്ന അബീസ് എന്ന ആംബുലന്സ് സര്വീസിലെ ജീവനക്കാരായ അലക്സ് ബേബി, വൈശാഖ്, അബു എന്നിവരും നാട്ടുകാരും ചേര്ന്നാണ് കാര് യാത്രികരെ രക്ഷപ്പെടുത്തിയത്. ദമ്പതികളായ ഷമീറിനും ഫാത്തിമയ്ക്കും തലയ്ക്കും മുഖത്തുമാണ് പരിക്കേറ്റത്. ഇരുവരും മേവറഞ്ഞ സ്വകാര്യ ആശുപത്രിയില് ചികിത്സയിലാണ്. കിളികൊല്ലൂര് പോലീസെത്തി ഗതാഗതം നിയന്ത്രിച്ചു. ഏറെ നേരം ഗതാഗത തടസമുണ്ടായി. വാഹനങ്ങള് സ്റ്റേഷനിലേക്ക് മാറ്റി.
