തിരുവനന്തപുരം : സംസ്ഥാനത്ത് ഇപ്പോഴുള്ളത് കൊവിഡ് മൂന്നാം തരംഗമാണെന്ന് ഔദ്യോഗികമായി സ്ഥിരീകരിച്ച് സര്ക്കാര്. സംസ്ഥാനത്തിപ്പോള് ഡെല്റ്റ, ഒമിക്രോണ് വ്യാപനം ഉണ്ട്. ജനങ്ങളിലെ അശ്രദ്ധയും ജാഗ്രതക്കുറവും ഈ രോഗവ്യാപനത്തിന് കാരണമാണെന്ന് ആരോഗ്യമന്ത്രി പറഞ്ഞു. ക്രിസ്മസ്, പുതുവത്സരാഘോഷങ്ങള് മറ്റൊരു കാരണമാണ്. മൂന്നാഴ്ചയ്ക്കുള്ളില് ഈ രോഗവ്യാപനം അതിന്റെ ഉന്നതിയില് എത്തുമെന്നാണ് സര്ക്കാരിന്റെ കണക്കുകൂട്ടല്.
ഇനി വരാനിരിക്കുന്ന ഒരു മാസം നിര്ണായകമാണ്. പല ജില്ലകളില് പല തോതില് കേസുകള് ഉയരും. സംസ്ഥാനസര്ക്കാര് ഒമിക്രോണ് ടെസ്റ്റ് കിറ്റിന് ടെന്ഡര് നല്കിയിട്ടുണ്ടെന്നും അത് ഉടനടി ലഭ്യമാക്കുമെന്നും ആരോഗ്യമന്ത്രി വ്യക്തമാക്കി. സംസ്ഥാനത്ത് ഇനി ജനിതകശ്രേണി പരിശോധനയില് പ്രസക്തി ഇല്ല. പക്ഷേ പുതിയ വകഭേദങ്ങള് ഉണ്ടോ എന്നറിയാന് പരിശോധന തുടരും. ചിന്തിക്കുന്നതിനെക്കാള് വേഗത്തില് തീവ്രവ്യാപനം നടക്കുന്നു. സമൂഹവ്യാപനം ഉണ്ടാകാന് സാധ്യതയുണ്ട്. ഒരാഴ്ചയ്ക്കുള്ളില് ഇക്കാര്യം വ്യക്തമാകുമെന്നും ആരോഗ്യമന്ത്രി പറഞ്ഞു.
