ന്യൂഡല്ഹി: തിരുവന്തപുരം, ആലപ്പുഴ ഉള്പ്പെടെ രാജ്യത്തെ 13 ജില്ലകളില് കോവിഡ് മരണനിരക്ക് ദേശീയ ശരാശരിയെക്കാള് മുകളിലെന്ന് കേന്ദ്ര ആരോഗ്യ മന്ത്രാലയം. രാജ്യത്തെ കോവിഡ് മരണത്തില് 14 ശതമാനവും ഈ ജില്ലകളില് നിന്നാണെന്നും ആരോഗ്യമന്ത്രാലയം പറയുന്നു.
അസമിലെ കാംരൂപ് മെട്രോ, ബീഹാറിലെ പട്ന, ഝാര്ഖണ്ഡിലെ റാഞ്ചി, കേരളത്തിലെ ആലപ്പുഴ, തിരുവന്തപുരം, ഒഡീഷയിലെ ഗഞ്ചാം, ഉത്തര്പ്രദേശിലെ ലഖ്നൗ, പശ്ചിമബംഗാളിലെ നോര്ത്ത് 24 പാരഗണ്, ഹൂഗ്ലി, കൊല്ക്കത്ത, മാല്ഡ, ഡല്ഹി എന്നിവിടങ്ങളിലാണ് മരണനിരക്ക് ദേശീയ ശരാശരിയെക്കാള് മുകളില്. രാജ്യത്തെ രോഗബാധിതരില് ഒമ്പതു ശതമാനവും ഈ 14 ജില്ലകളില് നിന്നുമാണ്. ഇവിടങ്ങളില് പരിശോധനയുടെ എണ്ണം വര്ധിപ്പിക്കാനും എളുപ്പത്തില് പരിശോധനാ ഫലം ലഭിക്കുന്നതിനും നടപടി സ്വീകരിക്കാനാണ് നീക്കം.
കാംരൂപ്, ലഖ്നൗ, തിരുവനന്തപുരം, ആലപ്പുഴ എന്നിവിടങ്ങളില് പുതുതായി രോഗം സ്ഥിരീകരിക്കുന്നവരുടെ എണ്ണത്തില് വന്വര്ധന രേഖപ്പെടുത്തുന്നുണ്ട്. കേന്ദ്ര ആരോഗ്യ സെക്രട്ടറി രാജേഷ് ഭൂഷന്റെ അധ്യക്ഷതയില് ചേര്ന്ന യോഗത്തില് ആംബുലന്സ് സൗകര്യം ഉള്പ്പെടെ ഒരുക്കാന് സംസ്ഥാനങ്ങള്ക്ക് നിര്ദേശം നല്കി. രണ്ടാഴ്ചയായി രാജ്യത്തെ രോഗബാധിതരുടെ എണ്ണത്തില് വന്വര്ധന രേഖപ്പെടുത്തിയിരുന്നു. രോഗബാധിതരുടെ എണ്ണം 21 ലക്ഷം കടന്നു.
