തിരുവനന്തപുരം : സംസ്ഥാനത്ത് 23 ലക്ഷം പേര്ക്കുവരെ കോവിഡ് വന്നു പോയിട്ടുണ്ടാകാമെന്നാണ് കേരളത്തില് ഐ.സി.എം.ആര് നടത്തിയ സിറോ സര്വേ ഫലം വ്യക്തമാക്കുന്നത് . എറണാകുളം, തൃശൂര് , പാലക്കാട് ജില്ലകളില് ഓഗസ്റ്റ് അവസാനവാരത്തിലാണ് സിറോ സര്വേ നടന്നത്. 1181 പേരെ പരിശേധിച്ചതില് 11 പേര്ക്ക് രോഗം വന്നു പോയെന്ന് കണ്ടെത്തി. നിരക്ക് -0.8% . ഇതിന്റെ ആറു മുതല് 10 ഇരട്ടി വരെ ആളുകള്ക്ക് രോഗം വന്നിരിക്കാമെന്നാണ് സര്വേയുടെ അടിസ്ഥാനത്തിലുള്ള നിഗമനം.
അതായത് ഇപ്പോഴത്തെ ആകെ രോഗബാധിതര് 2.29 ലക്ഷം . ഇതിന്റെ പത്തിരട്ടിയായ 23 ലക്ഷം പേര്ക്ക് രോഗം വന്നു പോയിട്ടുണ്ടാകാം. ആകെ ജനസംഖ്യയുടെ മുപ്പത് ശതമാനം വൈറസ് ബാധിതരായാല് രോഗം മൂര്ധന്യാവസ്ഥയിലെത്തി കുറഞ്ഞു തുടങ്ങുമെന്നാണ് വിദഗ്ധര് അഭിപ്രായപ്പെടുന്നത്. ഈ കണക്കനുസരിച്ച് മൂന്നരക്കോടി ജനസംഖ്യയുള്ള കേരളത്തിന്റെ കോവിഡ് മൂര്ധന്യാവസ്ഥ ഇനിയും അകലെയാണെന്ന് ചുരുക്കം .
അതേ സമയം സര്വേ ഫലം ഓഗസ്റ്റിലെ കണക്കുകള് പ്രകാരമാണെന്നും ഇപ്പോള് ഈ അവസ്ഥയ്ക്ക് മാറ്റം വന്നിരിക്കാമെന്നും അനുമാനമുണ്ട്. സര്വേ ഫല പ്രകാരം പോസിറ്റീവാകുന്നവരെ പരിശോധനയില് തിരിച്ചറിയാത്തത് ഇതര സംസ്ഥാനങ്ങളെ അപേക്ഷിച്ച് കേരളത്തില് വളരെ കുറവാണെന്നും ഇത് മികച്ച പ്രതിരോധ പ്രവര്ത്തനങ്ങള് കൊണ്ടെന്നുമാണ് വിലയിരുത്തല്.
