കൊല്ലം: കോവിഡ് ബാധിതന് ആദ്യം എത്തിയ കൊല്ലത്തെ മൂന്ന് ആശുപത്രികളും ഒരു ലാബും അടച്ചു. രോഗി കൊല്ലത്തെത്തിയ ശേഷം സന്ദര്ശിച്ച രണ്ടു സ്വകാര്യ ആശുപത്രികളും പി.എച്ച്.സിയും ലാബുമാണ് അടച്ചത്. രോഗബാധിതനൊപ്പം വിമാനത്തില് വന്നവരുടെ പട്ടിക ജില്ല ഭരണകൂടം പുറത്തിറക്കി. ഇതില് 25 പേര് കൊല്ലം ജില്ലക്കാരാണ്. രോഗിയുമായി അടുത്തിടപഴകിയ മുപ്പതോളംപേരെ കര്ശന നിരീക്ഷണത്തിലാക്കി. പത്തുപേരെ ഐസൊലേഷനില് പ്രവേശിപ്പിച്ചു. ഇതില് കുടുംബാംഗങ്ങളും ബന്ധുക്കളും ഒരു ഓട്ടോ ഡ്രൈവറും ഉള്പ്പെടുന്നു.
മാര്ച്ച് 18നാണ് ഇയാള് തിരുവനന്തപുരം വിമാനത്താവളത്തില് എത്തുന്നത്. അവിടെനിന്നും ഒരു ചായക്കടയിലെത്തിയിരുന്നു. അവിടെയെത്തിയവരെയും ചായക്കടയിലുണ്ടായിരുന്നവരെയും നിരീക്ഷണത്തിലാക്കിയിട്ടുണ്ട്. ഓട്ടോറിക്ഷയില് തമ്പാനൂരിലെത്തി അവിടെനിന്നും കെ.എസ്.ആര്.ടി.സി ബസിലാണ് കൊല്ലത്ത് എത്തിയത്. അവിടെനിന്നും വീണ്ടും ഓട്ടോറിക്ഷയില് വീട്ടിലെത്തുകയായിരുന്നു.
ഇവിടെനിന്നും മൂന്നു ആശുപത്രികളിലാണ് ഇദ്ദേഹം പരിശോധനക്കായി എത്തിയത്. ആശുപത്രിയില് ഈ സമയത്ത് ഡ്യൂട്ടിയിലുണ്ടായിരുന്ന ഡോക്ടര്മാരെയും ജീവനക്കാരെയും കൂടാതെ ആ സമയത്ത് ആശുപത്രിയില് ഉണ്ടായിരുന്നവരെയും നിരീക്ഷണത്തിലാക്കി. കൂടുതല് പേര്ക്കായി പരിശോധന ആരംഭിച്ചു. രോഗി അതിനുശേഷം സന്ദര്ശിച്ച ഒരു സ്വകാര്യ ലാബും പൂട്ടി.
