ന്യൂഡല്ഹി: ബ്രിട്ടനില് ജനിതകമാറ്റം സ്ഥിരീകരിച്ച കൊറോണ വൈറസ് പടരുന്ന സാഹചര്യത്തില് യു.കെയില്നിന്നുള്ള വിമാനങ്ങള്ക്കുണ്ടായിരുന്ന വിലക്ക് ഇന്ത്യ നീട്ടി. ഡിസംബര് 31 വരെയുണ്ടായിരുന്ന വിലക്ക് ജനുവരി ഏഴുവരെയാണ് നീട്ടിയത്. ജനുവരി ഏഴിന് ശേഷം കര്ശന നിയന്ത്രണങ്ങളോടെ വിമാന സര്വിസ് പുനരാരംഭിക്കുമെന്നും വിശദാംശങ്ങള് പിന്നീട് അറിയിക്കുമെന്നും വ്യോമയാനമന്ത്രി ഹര്ദീപ് സിങ് പുരി ട്വീറ്റ് ചെയ്തു.
ബ്രിട്ടനില് ജനിതകമാറ്റം സംഭവിച്ച കൊറോണ വൈറസ് പടര്ന്നുപിടിച്ച സാഹചര്യത്തില് ഡിസംബര് 31 വരെ വിമാനവിലക്ക് ഏര്പ്പെടുത്തുകയായിരുന്നു. ബ്രിട്ടനിലെ അതിവ്യാപന വൈറസ് ബാധ ഇന്ത്യയില് 20 പേര്ക്കാണ് ഇതുവരെ സ്ഥിരീകരിച്ചത്. ചൊവ്വാഴ്ച ആറുപേര്ക്ക് രോഗം സ്ഥിരീകരിച്ചിരുന്നു. 14 പേര്ക്ക് ബുധനാഴ്ച രോഗം സ്ഥിരീകരിച്ചു. ഒരു മാസത്തിനിടെ യു.കെയില് നിന്ന് 33,000 പേരാണ് ഇന്ത്യയിലെത്തിയത്. ഇവരെല്ലാവരും നിരീക്ഷണത്തിലാണെന്നും ആരോഗ്യമന്ത്രാലയം അറിയിച്ചു.
ബ്രിട്ടനിലും ദക്ഷിണാഫ്രിക്കയിലും ജനിതകമാറ്റം സംഭവിച്ച കൊറോണ വൈറസ് ബാധ അതിവേഗം പടരുന്നുണ്ട്. ഡെന്മാര്ക്ക്, നെതര്ലന്ഡ്സ്, ആസ്ട്രേലിയ, ഇറ്റലി, സ്വീഡന്, ഫ്രാന്സ്, സ്പെയിന്, സ്വിറ്റ്സര്ലന്ഡ്, ജര്മനി, കാനഡ, ജപ്പാന്, െലബനന്, സിംഗപ്പൂര് എന്നീ രാജ്യങ്ങളിലും പുതിയ കൊറോണ വൈറസ് വകഭേദം സ്ഥിരീകരിച്ചിട്ടുണ്ട്.
