തിരുവനന്തപുരം : വിവാഹം, മരണാനന്തര ചടങ്ങുകള് എന്നിവയില് പങ്കെടുക്കാവുന്നവരുടെ എണ്ണം പരമാവധി 50 ആക്കി പരിമിതപ്പെടുത്താന് കൊവിഡ് അവലോകന യോഗത്തിന്റെ തീരുമാനം. നിലവിലെ ഒമിക്രോണ് വ്യാപന സാഹചര്യത്തില് കല്യാണം, മരണാനന്തര ചടങ്ങുകള് എന്നിവയില് പങ്കെടുക്കാവുന്നവരുടെ എണ്ണം പരമാവധി 50 ആയി പരിമിതപ്പെടുത്താന് മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്ന കൊവിഡ് അവലോകന യോഗം തീരുമാനിച്ചു. ഒത്തുചേരലുകളും ചടങ്ങുകളും പൊതുവായ സാമൂഹ്യ, രാഷ്ട്രീയ, സാംസ്കാരിക, സാമുദായിക പരിപാടികളും അത്യാവശ്യ സന്ദര്ഭങ്ങളിലൊഴികെ ഓണ്ലൈനായി നടത്തണം. അത്യാവശ്യ സന്ദര്ഭങ്ങളില് പരിപാടികള് നേരിട്ട് നടത്തുമ്പോള് ശാരീരിക അകലമടക്കമുള്ള മുന്കരുതലുകള് എടുക്കണം. പൊതുയോഗങ്ങള് ഒഴിവാക്കണം.
15 വയസ്സിന് മുകളിലുള്ള വിദ്യാര്ഥികള്ക്കുള്ള വാക്സിനേഷന് ഈ ആഴ്ച തന്നെ പൂര്ത്തീകരിക്കുമെന്ന് ആരോഗ്യ, വിദ്യാഭ്യാസ വകുപ്പുകള് ഉറപ്പു വരുത്തണം. വിദ്യാഭ്യാസ സ്ഥാപനങ്ങളില് പോയി വാക്സിനേഷന് നല്കുന്ന കാര്യം പരിശോധിക്കും. കുടുംബശ്രീ തിരഞ്ഞെടുപ്പ്, ഗ്രാമസഭ എന്നിവ ശാരീരിക അകലം പാലിച്ച് കൊവിഡ് മാനദണ്ഡമനുസരിച്ച് നടത്താവുന്നതാണ്. ടെലിമെഡിസിന് സംവിധാനം നല്ലതുപോലെ നടപ്പാക്കാനാവണം. ഒമിക്രോണുമായി ബന്ധപ്പെട്ട് വലിയതോതില് ബോധവത്കരണം നടത്തുമെന്നും മുഖ്യമന്ത്രി പറഞ്ഞു. അതേസമയം, രാത്രികാല, വാരാന്ത്യ കര്ഫ്യൂ അടക്കമുള്ള കര്ശന നിയന്ത്രണങ്ങള് നിലവില് ഏര്പ്പെടുത്തില്ല.
