കാസര്കോട് : ജില്ലയില് കോവിഡ് വ്യാപനം വര്ധിക്കുന്ന സാഹചര്യത്തില് പൊതുപരിപാടികള് വിലക്കി ഉത്തരവിറക്കിയ കളക്ടര് രണ്ടു മണിക്കൂറിനകം പിന്വലിച്ച സംഭവമാണ് ഇപ്പോള് സമൂഹ മാധ്യമങ്ങളില് ചര്ച്ചാവിഷയം. വെള്ളിയാഴ്ച തുടങ്ങുന്ന സി.പി.എം ജില്ല സമ്മേളനത്തിന്റെ പശ്ചാത്തലത്തിലാണ് പിന്മാറ്റമെന്നാണ് നെറ്റിസണ്സിന്റെ വിമര്ശനം. എന്നാല്, വിമര്ശനമുയര്ന്നതോടെ ജില്ലാ കളക്ടര് വിശദീകരണവുമായി രംഗത്തെത്തി. പാര്ട്ടികളുടെ സമ്മര്ദ്ദത്തിന് വഴങ്ങി ഉത്തരവ് ഇറക്കിയതിനുശേഷം പിന്വലിച്ചുവെന്ന മാധ്യമങ്ങളുടെ റിപ്പോര്ട്ടുകള് ശരിയല്ലെന്നും സര്ക്കാറിന്റെ മാര്ഗനിര്ദേശം മാറിയപ്പോള് അതനുസരിച്ചാണ് നിയന്ത്രണങ്ങളില് മാറ്റം വരുത്തിയതെന്നും ഫേസ്ബുക്കില് പങ്കുവെച്ച വിശദീകരണ പോസ്റ്റില് കളക്ടര് സ്വാഗത് ഭണ്ഡാരി വ്യക്തമാക്കി.
ടിപിആര് അനുസരിച്ചുള്ള നിയന്ത്രണങ്ങളില് നിന്ന് മാറി ആശുപത്രിയില് പ്രവേശിപ്പിക്കപ്പെടുന്നവരുടെ എണ്ണം അനുസരിച്ച് നിയന്ത്രണങ്ങള് ഏര്പ്പെടുത്താനുള്ള തീരുമാനത്തെ വ്യക്തിപരമായി സ്വാഗതം ചെയ്യുന്നുവെന്ന് കലക്ടര് പറഞ്ഞു. നിയന്ത്രണങ്ങള് ബാധിക്കുന്നത് സാധാരണക്കാരുടെ ജീവിതത്തേയാണ്. നിലവില് കേസുകളുടെ എണ്ണം കൂടുതലാണെങ്കിലും ആശുപത്രിയില് പ്രവേശിപ്പിക്കപ്പെടുന്നവരുടെ എണ്ണം വര്ധിക്കാത്ത സാഹചര്യത്തില് പൂര്ണമായ നിയന്ത്രണങ്ങളുടെ ആവശ്യമുണ്ടെന്ന് കരുതുന്നില്ലെന്നും അവര് കൂട്ടിച്ചേര്ത്തു. എന്നാല് ഫേസ്ബുക്ക് കുറിപ്പിന് താഴെ വിമര്ശനങ്ങളും ട്രോളുകളുമായി നൂറ് കണക്കിന് പേരാണ് എത്തിയത്. സമ്മേളനം കഴിഞ്ഞ ജില്ല, സമ്മേളനം നടന്നു കൊണ്ടിരിക്കുന്ന ജില്ല, സമ്മേളനം നടക്കാനുള്ള ജില്ല എന്നിങ്ങനെ കോവിഡ് പ്രതിരോധത്തിനായി സര്ക്കാര്, ജില്ലകളെ മൂന്നായി തിരിച്ചിരിക്കുകയാണെന്ന് ട്രോളന്മാര് പറയുന്നു.
