തിരുവനന്തപുരം: കോവിഡ് രണ്ടാം തരംഗം രൂക്ഷമായ സാഹചര്യത്തില് സംസ്ഥാനത്ത് ഇന്നും നാളെയും ലോക്ക്ഡൗണിനു സമാനമായ നിയന്ത്രണങ്ങള്. ശനി, ഞായര് ദിവസങ്ങളില് എല്ലാവരും വീട്ടില്ത്തന്നെ ഇരിക്കാന് തയ്യാറാകണമെന്നാണ് മുഖ്യമന്ത്രി പിണറായി വിജയന് ഇന്നലെ ആവശ്യപ്പെട്ടത്. ഈ ദിവസങ്ങള് നമ്മുടെ കുടുംബത്തിനുവേണ്ടി നമുക്ക് മാറ്റിവെയ്ക്കാം. അനാവശ്യമായ യാത്രകളും പരിപാടികളും ഈ ദിവസങ്ങളില് അനുവദനീയമല്ലെന്നും മുഖ്യമന്ത്രി വ്യക്തമാക്കിയിരുന്നു.
ഇന്നത്തെ ഹയര്സെക്കന്ഡറി പരീക്ഷ മുന് നിശ്ചയപ്രകാരം നടക്കും. അധ്യാപകര്ക്കും കുട്ടികള്ക്കും യാത്ര ചെയ്യാന് അനുവാദമുണ്ട്. പരീക്ഷാകേന്ദ്രങ്ങളില് കുട്ടികളെ എത്തിക്കുന്ന രക്ഷകര്ത്താക്കള് അവിടെ കൂട്ടംകൂടി നില്ക്കാതെ ഉടന് മടങ്ങണം. പരീക്ഷ തീരുന്ന സമയത്ത് കുട്ടികളെ വിളിക്കാന് തിരിച്ചെത്തിയാല് മതി. പരീക്ഷാകേന്ദ്രത്തിനു മുന്നില് കുട്ടികളും രക്ഷകര്ത്താക്കളും തിരക്കുണ്ടാക്കാതെ സാമൂഹിക അകലം പാലിക്കണം. യാത്രാസൗകര്യങ്ങള്ക്കു വേണ്ട ഇടപെടല് നടത്താന് കളക്ടര്മാര്ക്കു സര്ക്കാര് നിര്ദേശം നല്കി.
ഇന്നും നാളെയും നേരത്തെ നിശ്ചയിച്ച വിവാഹങ്ങള് നടത്താം. ഹാളുകള്ക്കുളളില് പരമാവധി 75 പേര്ക്കും തുറസായ സ്ഥലങ്ങളില് 150 പേര്ക്കും മാത്രമായിരിക്കും പ്രവേശനം. മരണാനന്തര ചടങ്ങുകള്ക്ക് പരമാവധി 50 പേര്ക്ക് പങ്കെടുക്കാം. ചടങ്ങുകളില് ആകെ പങ്കെടുക്കാവുന്നവരുടെ എണ്ണമാണ് ഇത്. വിവാഹ ചടങ്ങുകളില് പങ്കെടുക്കാന് പോകുന്നവര് യാത്ര ചെയ്യുമ്പോള് തിരിച്ചറിയല് കാര്ഡും ക്ഷണക്കത്തും കരുതണം.
ദീര്ഘദൂര യാത്ര പൊതുവെ ഒഴിവാക്കണം. വിവാഹം, മരണം മുതലായ ചടങ്ങുകള്, ഏറ്റവും അടുത്ത ബന്ധുവായ രോഗിയെ സന്ദര്ശിക്കല്, മരുന്ന്, ഭക്ഷണം എന്നിവയ്ക്കായി യാത്ര ചെയ്യാന് അനുവാദമുണ്ട്. ഇവയ്ക്കുവേണ്ടി സഞ്ചരിക്കുന്നവര് സ്വന്തമായി തയാറാക്കിയ സത്യപ്രസ്താവന കരുതണം. ഇതിനു പ്രത്യേക മാതൃക ഇല്ല.
ട്രെയിന്, വിമാന സര്വീസുകള് പതിവുപോലെ ഉണ്ടായിരിക്കും. പോലീസ് പരിശോധനാ സമയത്ത് യാത്രക്കാര്ക്കു ടിക്കറ്റ് അഥവാ ബോര്ഡിങ് പാസ്, തിരിച്ചറിയല് കാര്ഡ് എന്നിവ കാണിക്കാം. ഹോട്ടലുകള്ക്കും റെസ്റ്റോറന്റുകള്ക്കും ഹോം ഡെലിവറി നടത്താം. വളരെ അത്യാവശ്യഘട്ടങ്ങളില് ഹോട്ടലുകളില് പോയി ഭക്ഷണം വാങ്ങാം. ഇതിനായി സത്യപ്രസ്താവന കയ്യില് കരുതണം.
ടെലികോം, ഐടി, ആശുപത്രികള്, മാധ്യമസ്ഥാപനങ്ങള്, പാല്, പത്രവിതരണം, ജലവിതരണം, വൈദ്യുതി എന്നിവയുമായി ബന്ധപ്പെട്ട സ്ഥാപനങ്ങള് പ്രവര്ത്തിക്കും. വീടുകളില് മത്സ്യം എത്തിച്ച് വില്പ്പന നടത്തുന്നതിന് തടസമില്ല. എന്നാല് വില്പ്പനക്കാര് മാസ്ക് ധരിക്കുന്നത് ഉള്പ്പെടെയുള്ള കോവിഡ് നിയന്ത്രണങ്ങള് കര്ശനമായി പാലിക്കണം.
ഗൗരവതരമായ സ്ഥിതിയാണ് രൂപപ്പെടുന്നതും കര്ക്കശമായ നിയന്ത്രണങ്ങള് ഏര്പ്പെടുത്തേണ്ടിവരുമെന്നാണ് മുഖ്യമന്ത്രി ഇന്നലെ പറഞ്ഞത്. തുടര് നിയന്ത്രണങ്ങളുടെ കാര്യം തിങ്കളാഴ്ച ചേരുന്ന രാഷ്ട്രീയ പാര്ടികളുടെ യോഗത്തില് ചര്ച്ച ചെയ്ത് തീരുമാനിക്കുമെന്നും മുഖ്യമന്ത്രി വ്യക്തമാക്കിയിട്ടുണ്ട്.
