കൊച്ചി: സിപിഎം പാർട്ടി കോൺഗ്രസിൽ പങ്കെടുത്ത ഉദ്യോഗസ്ഥനെതിരെ നടപടി സ്വീകരിക്കണമെന്ന വീണ്ടും പരാതി. ഭരണം മാറിയ സാഹചര്യത്തിലാണ് എറണാകുളം വിദ്യാഭ്യാസ ഉപഡയറക്ടറുടെ കാര്യാലയത്തിലെ അഡ്മിനിസ്ട്രേറ്റീവ് അസിസ്റ്റൻറ് ഡി. ഉല്ലാസിനെതിരെ വിദ്യാഭ്യാസ വകുപ്പിൽ പരാതി നൽകിയത്. പാർട്ടി കോൺഗ്രസിൽ പങ്കെടുക്കുന്ന ചിത്രങ്ങൾ അടക്കമാണ് പരാതിയുള്ളത്. 2025 ഏപ്രിൽ രണ്ട് മുതൽ ആറ് വരെ മധുരയിൽ നടന്ന പാർട്ടി കോൺഗ്രസിൽ പങ്കെടുത്ത ഉല്ലാസ് ജീവനക്കാരുടെ സർവീസ് ചട്ടം ലംഘിച്ചതായാണ് പരാതി. തൃക്കാക്കര സ്വദേശിയായ സി.എ സജീവനാണ് പരാതി നൽകിയത്. ഈ ദിവസങ്ങളിൽ ഉല്ലാസ് അവധിയായിരുന്നോ എന്നുള്ളതും മൊബൈൽ ഫോൺ ലൊക്കേഷനും അന്വേഷിക്കണമെന്നും ആവശ്യപ്പെട്ടിട്ടുണ്ട്.
കഴിഞ്ഞ വർഷം ഇതേവിഷയത്തിൽ സജീവൻ പരാതി നൽകിയിരുന്നു. ഈ പരാതിയിൽ നടപടിയുണ്ടായില്ല. പരാതിപ്പെട്ട വ്യക്തിയുടെ വിലാസം ലഭ്യമല്ലാത്തതിനാൽ വിവരം അറിയിക്കാൻ സാധിച്ചില്ലെന്നാണ് അധികൃതർ വ്യക്തമാക്കുന്നത്. ഇത്തവണ പരാതിക്കാരൻ്റെ മേൽവിലാസം ലഭ്യമായതിനാൽ നടപടി അറിയിക്കുമെന്നും സർക്കാർ അധികൃതർ അറിയിച്ചിട്ടുണ്ട്.
