കൊച്ചി: ലോക്ക്ഡൗണ് ദിനത്തില് വഴി തടഞ്ഞ പോലീസുകാരനോട് തട്ടിക്കയറുന്ന വീഡിയോയ്ക്ക് വിശദീകരണവുമായി സിപിഎം കളമശേരി ഏരിയാ സെക്രട്ടറി സക്കീര് ഹുസൈന്. കെ.എസ്.എഫ്.ഇ. ജീവനക്കാരിയായ ഭാര്യയെ ജോലിക്ക് എത്തിക്കാനായാണ് താന് പോയതെന്ന് സക്കീര് ഹുസൈന് ഫെയ്സ്ബുക്ക് പേജില് പോസ്റ്റ് ചെയ്ത വോയ്സ് നോട്ടില് വിശദീകരിക്കുന്നു. ഇക്കാര്യം പറഞ്ഞിട്ടും പോലീസുകാരന് പോകാന് അനുവദിച്ചില്ലെന്നും തര്ക്കത്തിന്റെ ഒരു ഭാഗം മാത്രം അടര്ത്തിയെടുത്ത് പ്രചരിപ്പിക്കുകയാണെന്നും സക്കീര് ആരോപിച്ചു.
ബുധനാഴ്ച ആലുവ മുട്ടത്തുവെച്ച് തന്നെ തടഞ്ഞ പോലീസുകാരനോട് ‘ഞാന് സക്കീര് ഹുസൈന്, സിപിഎമ്മിന്റെ കളമശ്ശേരി ഏരിയാ സെക്രട്ടറി’ എന്നു പറയുന്ന വീഡിയോയാണ് സമൂഹമാധ്യമങ്ങളില് വ്യാപകമായി പ്രചരിച്ചത്. ബോധവത്ക്കരിക്കാനാണ് ശ്രമിച്ചതെന്ന് പോലീസുകാരന് പറയുമ്പോള് ഇങ്ങനെയല്ല ബോധവത്ക്കരിക്കേണ്ടതെന്നും സക്കീര് ഹുസൈന് പറയുന്നുണ്ട്. എന്നാല് പോലീസുകാരന് തന്നെ വീഡിയോ എടുത്ത് അതിലെ ഒരു ഭാഗം മാത്രം പ്രചരിപ്പിക്കുകയാണെന്ന് സക്കീര് ഹുസൈന് ആരോപിക്കുന്നു.
