ആലപ്പുഴ : സി.പി.എം സമ്മേളനങ്ങള്‍ നടക്കുന്നതിനിടെ പലരും പാര്‍ട്ടി വിടുന്നു. വിഭാഗീയത അരങ്ങേറുകയോ നേതൃത്വത്തിലെത്താന്‍ ചരടുവലി നടക്കുകയോ ചെയ്തിടത്താണിത്. ഇത്തരത്തിലുള്ളവര്‍ സി.പി.ഐയിലാണ് ചെക്കേറുന്നത്. ഒരാഴ്ചക്കിടെ മാരാരിക്കുളത്തും കായംകുളത്തുമായി സി.പി.എം പ്രാദേശിക നേതാക്കള്‍ ഉള്‍പ്പെടെ 19 പേരാണ് സി.പി.ഐയില്‍ ചേര്‍ന്നത്. കായംകുളം പുതുപ്പള്ളിയില്‍ 11 സി.പി.എം പ്രാദേശിക നേതാക്കളാണ് പാര്‍ട്ടിവിട്ടത്.
ലോക്കല്‍ കമ്മിറ്റി മുന്‍ അംഗങ്ങളും ഡി.വൈ.എഫ്.ഐ മുന്‍ മേഖല പ്രസിഡന്റും ഉള്‍പ്പെടെയുള്ളവരുണ്ട് ഇക്കൂട്ടത്തില്‍. മാരാരിക്കുളം ഏരിയ സമ്മേളനത്തിന് പിന്നാലെയാണ് എട്ട് സജീവ പ്രവര്‍ത്തകര്‍ സി.പി.ഐയില്‍ ചേര്‍ന്നത്. ഡി.വൈ.എഫ്.ഐ നേതാവും പാര്‍ട്ടി മുന്‍ ബ്രാഞ്ച് സെക്രട്ടറിയുമടക്കമാണ് മാരാരിക്കുളം ഏരിയ സമ്മേളനം അവസാനിച്ച്‌ മണിക്കൂറുകള്‍ക്കകം സി.പി.ഐയില്‍ അംഗത്വമെടുത്തത്.
സി.പി.ഐ ജില്ല അസി. സെക്രട്ടറി ജി. കൃഷ്ണപ്രസാദിന്റെ നേതൃത്വത്തിലാണ് പ്രവര്‍ത്തകരെ പാര്‍ട്ടിയിലേക്ക് സ്വീകരിച്ചത്. കൊഴിഞ്ഞുപോക്ക് വിഭാഗീയതയുടെ പേരിലെന്നാണ് വിവരം. എന്നാല്‍ സി.പി.ഐയില്‍ ചേര്‍ന്നത് പാര്‍ട്ടിയുടെ സജീവ പ്രവര്‍ത്തകരല്ലെന്നും ഇതിന് സമ്മേളനവുമായി ബന്ധമില്ലെന്നും തെരഞ്ഞെടുക്കപ്പെട്ട ഏരിയ നേതൃത്വം പറയുന്നു.
