തിരുവനന്തപുരം: കര്ണാടകത്തില് കോണ്ഗ്രസ് സര്ക്കാരിന്റെ സത്യപ്രതിജ്ഞാ ചടങ്ങില് കേരള മുഖ്യമന്ത്രി പിണറായി വിജയനെ ക്ഷണിക്കാത്തതില് കോണ്ഗ്രസിനെതിരെ രൂക്ഷ വിമര്ശനവുമായി സിപിഎം. സങ്കുചിതമായ നിലപാട് കോണ്ഗ്രസ് ഉപേക്ഷിക്കണമെന്ന് പ്രകാശ് കാരാട്ടും അപക്വമായ തീരുമാനമെന്ന് എല്ഡിഎഫ് കണ്വീനറും കുറ്റപ്പെടുത്തി. കോണ്ഗ്രസ് വിജയത്തില് സിപിഎം ഉള്പ്പടെ പ്രതീക്ഷപ്രകടിപ്പിച്ചിട്ടും കേരള, തെലുങ്കാന മുഖ്യമന്ത്രിമാര്ക്ക് സത്യപ്രതിജ്ഞാ ചടങ്ങുകള്ക്ക് ക്ഷണമില്ല. ബിജെപിയെ ഒറ്റയ്ക്ക് പൊരുതി തോല്പ്പിക്കാന് കഴിയില്ലെന്ന യാഥാര്ത്ഥ്യം കോണ്ഗ്രസ് മനസിലാക്കണമെന്നും മതനിരപേക്ഷ കക്ഷികളെ ഒന്നിപ്പിച്ചുനിര്ത്തുന്ന നിലപാടാണ് സ്വീകരിക്കേണ്ടതെന്നും സിപിഎം പൊളിറ്റ് ബ്യൂറോ അംഗം പ്രകാശ് കാരാട്ട് പ്രതികരിച്ചു.
ദേശീയ രാഷ്ട്രീയം ശരിയായ നിലയില് വിലയിരുത്താന് കഴിയാത്ത ദുര്ബലമായ പാര്ട്ടിയായി കോണ്ഗ്രസ് മാറിയെന്ന് എല്ഡിഎഫ് കണ്വീനര് ഇ പി ജയരാജന് കുറ്റപ്പെടുത്തി. ഈ സമീപനമാണെങ്കില് കര്ണാടക സര്ക്കാര് എത്രകാലമെന്ന് കണ്ടറിയണമെന്നും അദ്ദേഹം പരിഹസിച്ചു. മറ്റ് കോണ്ഗ്രസ് മുഖ്യമന്ത്രിമാര്ക്ക് പുറമെ ജാര്ഖണ്ഡ് മുഖ്യമന്ത്രി ഹേമന്ത് സോറന്, തമിഴ്നാട് മുഖ്യമന്ത്രി എംകെ സ്റ്റാലിന്, പശ്ചിമ ബംഗാള് മുഖ്യമന്ത്രി മമത ബാനര്ജി, ഒഡീഷ മുഖ്യമന്ത്രി നവീന് പട്നായിക് എന്നിവരെയും സത്യപ്രതിജ്ഞാ ചടങ്ങിലേക്ക് ക്ഷണമുണ്ട്. അഖിലേഷ് യാദവ്, എന്സിപി അധ്യക്ഷന് ശരദ് പവാര്, മഹാരാഷ്ട്ര മുന് മുഖ്യമന്ത്രി ഉദ്ധവ് താക്കറെ, ബിഹാര് ഉപ മുഖ്യമന്ത്രി തേജസ്വി യാദവ്, ജമ്മു കശ്മീരിലെ നാഷണല് കോണ്ഫറന്സ് മേധാവി ഫാറൂഖ് അബ്ദുള്ള, എന്നിവരെയും ക്ഷണിച്ചിട്ടുണ്ട്.
