കുന്നന്താനം : കുന്നന്താനം പാലക്കൽത്തകിടി സെയ്ന്റ് മേരീസ് സർക്കാർ ഹൈസ്കൂളിൽ ഇംഗ്ലീഷ് അധ്യാപകനെ നിയമിക്കാത്തിൽ പ്രതിഷേധിച്ച് സിപിഎം കുന്നന്താനം നോർത്ത് ലോക്കൽ കമ്മിറ്റി സെക്രട്ടറി എസ്.വി. സുബിൻ കുത്തിയിരിപ്പ് സമരത്തിലേക്ക്. സ്കൂൾ തുറന്ന് ഒന്നരമാസം പിന്നിട്ടിട്ടും ഹൈസ്കൂൾ വിഭാഗത്തിൽ ഇംഗ്ലീഷ് പഠിപ്പിക്കുന്നതിന് അധ്യാപകരെ നിയമിച്ചിട്ടില്ല. പകരം സാമൂഹ്യശാസ്ത്ര അധ്യാപിക ഇംഗ്ലീഷ് പഠിപ്പിക്കണമെന്ന് നിർദേശിച്ചിരിക്കുകയാണ്. സാമൂഹ്യശാസ്ത്ര പാഠഭാഗങ്ങൾ പൂർത്തീകരിക്കുവാൻ കൂടുതൽ സമയം വേണമെന്നിരിക്കേ ഭാഷാപഠനത്തിന് വിഷയ വിദഗ്ധർ അല്ലാത്തവരെ ചുമതലപ്പെടുത്തുകവഴി അധ്യാപനം താളം തെറ്റാനിടയാകുമെന്ന് അദ്ദേഹം ആരോപിച്ചു.
അതിനാൽ ഈ മാസം 18-നകം അധ്യാപകനെ നിയമിക്കാത്തപക്ഷം 21-ന് കുത്തിയിരപ്പ് സമരം നടത്തുമെന്ന് സുബിൻ അറിയിച്ചു. ഈ സ്കൂളിൽ പത്തിൽ പഠിക്കുന്ന കുട്ടിയുടെ രക്ഷിതാവ് കൂടിയാണ് സുബിൻ. തിരുവല്ല ഡിഇഒയിൽനിന്ന് ജൂലായ് 15-നാണ് സ്റ്റാഫ് ഫിക്സേഷൻ ഉത്തരവ് ഇറങ്ങുക. അതുകഴിഞ്ഞേ ഇക്കാര്യത്തിൽ അന്തിമതീരുമാനം ഉണ്ടാവൂയെന്ന പ്രഥമാധ്യാപകൻ അറിയിച്ചു.
