തിരുവനന്തപുരം: എ.കെ.ജി സെന്റര്‍ ആക്രമണത്തില്‍ അന്വേഷണം യൂത്ത് കോണ്‍ഗ്രസ് നേതാക്കളെ കേന്ദ്രീകരിച്ചതിനെതിരെ കെ.പി.സി.സി പ്രസിഡന്റ് കെ സുധാകരന്‍. ജനങ്ങള്‍ വിഡ്ഢികളാണെന്ന് സി.പി.എം കരുതരുതെന്ന് സുധാകരന്‍ ഓര്‍മ്മിപ്പിച്ചു. ഇത്രയും മാസം പോലീസ് അന്വേഷിച്ചിട്ടും ഇപ്പോഴാണ് പ്രതികളെ മനസ്സിലായത്. മുന്‍ കൗണ്‍സിലര്‍ ഐ പി ബിനുവിന്റെ പേരാണ് എ കെ ജി സെന്ററിനടുത്ത് പെട്ടിക്കട നടത്തുന്ന സി പി എം അനുഭാവിയായ ദൃക്‌സാക്ഷി പോലീസിനോട് പറഞ്ഞത്.
എന്നാല്‍ ഇപ്പോള്‍ ഐ പി ബിനുവുമില്ല, ചായക്കടക്കാരനുമില്ല. കോണ്‍ഗ്രസുകാരനായ പ്രവര്‍ത്തകനും നേതാവിനോട് അടുപ്പമുള്ള ആളുമാണെന്നാണ് പോലീസില്‍നിന്ന് ലഭിക്കുന്ന വിവരം. ഇങ്ങനെ പോലീസിനെ കൊണ്ടുപോയാല്‍ പ്രത്യാഘാതം രാഷ്ട്രീയപരമായി ഗുരുതരമായിരിക്കുമെന്നും ഉയര്‍ന്ന നിലവാരമുള്ള ജനസമൂഹത്തിന്റെ മധ്യത്തിലാണ് നമ്മള്‍ ജീവിക്കുന്നതെന്ന് സി പി എം മറക്കരുതെന്നും സുധാകരന്‍ പറഞ്ഞു.
