പാലപ്പിള്ളി: എലിക്കോട് ആദിവാസി കോളനിക്കു സമീപമെത്തിയ ഒന്പതംഗ കാട്ടാനക്കൂട്ടത്തെ കുങ്കി ആനകള് കാട്ടിലേക്കു തിരികെ ഓടിച്ചു. പാലപ്പിള്ളി റേഞ്ച് ഓഫീസര് പ്രേം ഷെമീര് വനം വകുപ്പ് ഉന്നത ഉദ്യോഗസ്ഥരുമായി കൂടിയാലോചിച്ചശേഷം കുങ്കി ആനകളെ ഉപയോഗിച്ച് കാട്ടാനകളെ വനത്തിലേക്ക് ഓടിക്കുകയായിരുന്നു. എലിക്കോട് മുതല് കാഞ്ഞിരമുക്ക് വരെ ഏകദേശം രണ്ടര കിലോമീറ്റര് ദൂരമാണ് ആനകളെ ഓടിച്ചത്. കുങ്കി ആനകളെ കണ്ട് കാട്ടാനകൂട്ടം ചിതറി ഓടി.
കോളനിയിലേക്ക് പ്രവേശിക്കാതിരിക്കാന് വളരെ തന്ത്രപൂര്വമാണ് ഉദ്യോഗസ്ഥര് നീക്കം നടത്തിയത്. മുമ്പ് ഒറ്റയാന്മാരെ കാടുകയറ്റിയിട്ടുണ്ടെങ്കിലും കുങ്കി ആനകള് ആദ്യമായാണ് കൂട്ടമായെത്തിയ കാട്ടാനകളെ തുരത്തുന്നത്. കൊമ്പന്മാരായ കുങ്കി ആനകള് പിടിയാനകളായ കാട്ടാനകളെ കാണുമ്പോള് എപ്രകാരമായിരിക്കും പ്രതികരിക്കുക എന്ന ആശങ്ക ദൗത്യ സംഘത്തിനുണ്ടായിരുന്നു. ഇന്ന് എലിക്കോട് ഭാഗത്തേക്ക് കാട്ടാനകള് എത്താന് സാധ്യതയില്ലെന്നും റേഞ്ച് ഓഫീസര് പറഞ്ഞു. അതേസമയം കാട്ടാനകളെ എവിടെയെങ്കിലും കാണുകയാണെങ്കില് അറിയിക്കണമെന്ന് വാച്ചര്മാര്ക്കും നാട്ടുകാര്ക്കും ദൗത്യസംഘം നിര്ദേശം നല്കിയിട്ടുണ്ട്.
