കോന്നി : പുനലൂര് – മൂവാറ്റുപുഴ ഹൈവേയില് വകയാര് പാലത്തിന് സമീപം വാഹനങ്ങള് ഇടിച്ചുതകര്ന്ന ക്രാഷ് ബാരിയറുകള് അപകടഭീഷണിയായിട്ടും പുനസ്ഥാപിക്കുവാന് നടപടിയില്ല. നിരവധി വാഹനാപകടങ്ങളാണ് ഈ ഭാഗത്ത് നടന്നിട്ടുള്ളത്. അപകടത്തിന്റെ ആഘാതം കുറയ്ക്കുവാന് സ്ഥാപിച്ച ക്രാഷ് ബാരിയറുകള് പലപ്പോഴായി വാഹനങ്ങള് ഇടിച്ചതിനെ തുടര്ന്ന് വളയുകയും ഒടിയുകയും ചെയ്തിട്ടുണ്ട്. ഇനിയും ഈ ഭാഗത്ത് അപകടങ്ങള് നടന്നാല് ഇളകിമാറിയ ക്രാഷ് ബാരിയറിന്റെ കൂര്ത്ത ഭാഗങ്ങള് തുളച്ചുകയറിയാവും വലിയ ദുരന്തങ്ങള് നടക്കുക. പലതിന്റെയും ചുവട് ഇളകിമാറി ഒരു ഭാഗത്തേക്ക് മറിഞ്ഞുകിടക്കുന്നതും കാണാം.
രാത്രിയില് ഈ വഴിയുള്ള യാത്രയാണ് ഏറ്റവും കൂടുതല് അപകടക്കെണിയായി മാറുന്നത്. പൊതുവേ റോഡില് വീതികുറവായ ഈ ഭാഗത്ത് വാഹനങ്ങള് ഇടതുവശത്തേക്ക് തിരിക്കുമ്പോള് ടയറുകള് തെന്നിമാറി അപകടങ്ങള് നടക്കുവാന് സാധ്യത കൂടുതലാണ്. റോഡിലെ വെളിച്ചക്കുറവും അപകടങ്ങള് നടക്കുന്നതിന് പ്രധാന കാരണമാണ്. ചരക്കുവാഹനങ്ങള് ഉള്പ്പെടെ കൂടുതലും രാത്രിലാണ് ഇതുവഴി കടന്നുപോകുന്നത്. ഇത്തരം വാഹനങ്ങള് ഇടിച്ചാണ് ഈ ഭാഗത്തെ ക്രാഷ് ബാരിയറുകള് കൂടുതലും തകര്ന്നുപോയതും. കെ.എസ്.റ്റി.പി. യാണ് ക്രാഷ് ബാരിയര് പുനസ്ഥാപിക്കേണ്ടത്. കോന്നി താലൂക്ക് വികസന സമിതി യോഗങ്ങളില് ഉള്പ്പെടെ ഈ വിഷയം പലതവണ ആവര്ത്തിച്ചിട്ടും യാതൊരു നടപടിയും ഉദ്യോഗസ്ഥര് സ്വീകരിക്കുന്നില്ല.
