ചുങ്കപ്പാറ: പൊന്തൻപുഴ ചുങ്കപ്പാറ റോഡിൽ പഴയ തിയേറ്റർ ജംങ്ഷനു സമീപം തോടിൻ്റെ വശത്ത് ക്രാഷ് ബാരിയർ സ്ഥാപിക്കണമെന്ന ആവശ്യം ശക്തമാകുന്നു. ഇവിടെ തോടിനോട് ചേർന്നു പോകുന്ന റോഡിന് തോടുമായി ഒരു മീറ്റർ പോലും അകലമില്ല. പത്തടിയോളം താഴ്ചയുമുണ്ട്. വശങ്ങളിൽ കാടുമൂടി കിടക്കുന്നതിനാൽ തോടും റോഡും തമ്മിലുള്ള അകലം പോലും കാണാൻ കഴിയാത്ത അവസ്ഥയാണ്. 30 മീറ്റർ ദൂരത്തോളം അപകടമേഖലയാണ്. രണ്ട് വാഹനങ്ങൾ കടന്നുപോകുമ്പോൾ അൽപ്പം ശ്രദ്ധ തെറ്റിയാൽ അപകടം ഉറപ്പാണ്. മറ്റ് നിരവധി റോഡുകൾ വന്നുചേരുന്ന പ്രദേശവും കുത്തനെയുള്ള ഇറക്കം ഇറങ്ങി വരുന്ന സ്ഥലത്ത് കൊടുംവളവുമായതിനാൽ റോഡിൻ്റെ വീതി കുറവും അപകടസാധ്യതയ്ക്ക് ആക്കം കൂട്ടുന്നുണ്ട്.
രാത്രികാലങ്ങളിൽ സ്ഥലപരിചയമില്ലാതെ ഇതുവഴി വരുന്ന വാഹന യാത്രക്കാർ അപകടത്തിൽ പെടുന്നത് പതിവാണ്. രണ്ടു മാസം മുൻപ് നിയന്ത്രണം വിട്ട കാർ തോട്ടിലേക്ക് മറിഞ്ഞു ഭാഗ്യം കൊണ്ടാണ് യാത്രക്കാർ രക്ഷപ്പെട്ടത്. പലപ്പോഴും തലനാരിഴക്കാണ് അപകടങ്ങൾ ഒഴിവാക്കുന്നത്. കോട്ടയം പത്തനംതിട്ട ജില്ലകളെ തമ്മിൽ ബന്ധിപ്പിക്കുന്ന റോഡായതിനാൽ വാഹനങ്ങളുടെ തിരക്കാണ്. അപകട സാധ്യത നിലനിൽക്കുന്ന ഈ പ്രദേശത്ത് ക്രാഷ് ബാരിയർ സ്ഥാപിക്കാൻ അധികൃതരുടെ ഭാഗത്തുനിന്നും നടപടി ഉണ്ടാകണമെന്ന ആവശ്യം ശക്തമായിരിക്കുകയാണ്.
