ഒഡീഷ : കാണാതായ വനിതാ ക്രിക്കറ്റ് താരം രാജശ്രീ സ്വെയിനെ കാട്ടില് മരിച്ച നിലയില് കണ്ടെത്തി. കട്ടക് നഗരത്തിന് സമീപമുള്ള വനത്തിലെ മരത്തില് തൂങ്ങി മരിച്ച നിലയിലാണ് മൃതദേഹം കണ്ടെത്തിയതെന്ന് ഡെപ്യൂട്ടി പോലീസ് കമ്മീഷണര് പിനാക് മിശ്ര പറഞ്ഞു. അസ്വഭാവിക മരണത്തിന് ഗുരുദിജാട്ടിയ പോലീസ് കേസെടുത്തു. രാജശ്രീയെ ജനുവരി 11 മുതല് കാണാതായെന്ന് കാണിച്ച് പരിശീലകന് പോലീസില് പരാതി നല്കിയിരുന്നു. അതേ സമയം രാജശ്രീയുടെത് ആത്മഹത്യയല്ല കൊലപാതകമാണെന്ന് കുടുംബം ആരോപിച്ചു. രാജശ്രീയുടെ ശരീരത്തില് മുറിവുകള് ഉണ്ടായിരുന്നു. കണ്ണുകള്ക്ക് പരിക്കേറ്റിട്ടുണ്ടായിരുന്നതായും കുടുംബം പറഞ്ഞു.
ഒഡീഷ ക്രിക്കറ്റ് അസോസിയേഷന് ബജ്രകബതിയില് സംഘടിപ്പിച്ച പരിശീലന ക്യാമ്പില് സ്വെയ്ന് ഉള്പ്പെടെ 25 ഓളം വനിതാ ക്രിക്കറ്റ് താരങ്ങള് പങ്കെടുത്തതായി കുടുംബാംഗങ്ങള് പറഞ്ഞു. പുതുച്ചേരിയില് നടക്കാനിരിക്കുന്ന ദേശീയതല ക്രിക്കറ്റ് ടൂര്ണമെന്റിനുള്ള ടീമിനെ തെരഞ്ഞെടുക്കാനായിട്ടായിരുന്നു ക്യാമ്പ്. പരിശീലനത്തിനായി ഇവര് പ്രദേശത്തെ ഹോട്ടലിലായിരുന്നു താമസിച്ചിരുന്നത്. സംസ്ഥാന വനിതാ ക്രിക്കറ്റ് ടീമിനെ ജനുവരി 10ന് പ്രഖ്യാപിച്ചെങ്കിലും അന്തിമ പട്ടികയില് സ്വെയിന്റെ പേരുണ്ടായിരുന്നില്ല. താരങ്ങള് പരിശീലനത്തിനായി താംഗി ഏരിയയിലെ ക്രിക്കറ്റ് മൈതാനത്തേക്ക് പോയ ദിവസം സ്വെയിന് പിതാവിനെ കാണാനായി പുരിയില് പോവുകയാണെന്ന് പരിശീലകനെ അറിയിച്ചിരുന്നതായി പോലീസ് പറഞ്ഞു. സംഭവത്തില് പോലീസ് അന്വേഷണം ഊര്ജിതമാക്കി.
