ഷാർജ : പുരാതന ഇമിറാത്തി ജീവിതരീതികളും സംസ്കാരവും ഉപജീവന മാർഗവും പുതിയ കാലത്തിന് പരിചയപ്പെടുത്തുകയാണ് ഷാർജയിലെ പൈതൃകദിന ആഘോഷത്തിലൂടെ. ‘കണക്റ്റ്’ എന്ന പ്രമേയത്തിലൂടെയാണ് ഈ വർഷത്തെ 21-ാമത് പതിപ്പ് ‘ഷാർജ പൈതൃകദിനങ്ങൾ സംഘടിപ്പിച്ചിരിക്കുന്നത്. ഷാർജ ഇൻസ്റ്റിറ്റ്യൂട്ട് ഫോർ ഹെറിറ്റേജ് സംഘടിപ്പിക്കുന്ന പൈതൃക ദിനാഘോഷത്തിൽ ദിനംപ്രതി തിരക്ക് വർധിക്കുകയാണ്.
ഷാർജ സിറ്റി, അൽ ഹംരിയ, ദിബ്ബ അൽ ഹിസ്നൻ, ഖോർഫക്കാൻ, കൽബ, അൽ ദൈദ് എന്നീ നഗരങ്ങളിലാണ് ‘പൈതൃക ദിനങ്ങൾ’ നടക്കുന്നത്. ഇമിറാത്തികൾക്കുപുറമെ താമസക്കാരും സന്ദർശകരും ആഘോഷത്തിന്റെ ഭാഗമാകുന്നു. ഷാർജയിലെ സ്കൂൾ വിദ്യാർഥികളും ചരിത്ര, സംസ്കാര വിജ്ഞാനത്തിനായി നഗരികളിലെത്തുന്നുണ്ട്. ഒട്ടേറെ വിനോദപരിപാടികളും പ്രദർശനങ്ങളും പൈതൃകദിന ആഘോഷത്തിലുണ്ട്.
