കോന്നി: മലയാലപ്പുഴ പഞ്ചായത്തിലെ വെട്ടൂർ ആയൂർവേദ ആശുപത്രിയ്ക്ക് മലയാലപ്പുഴയിൽ ഒരു സബ് സെൻ്റർ അനുവദിച്ച് സർക്കാർ ഉത്തരവായതായി അഡ്വ.കെ.യു.ജനീഷ് കുമാർ എം.എൽ.എ അറിയിച്ചു. മലയാലപ്പുഴ ഗ്രാമപഞ്ചായത്തിൻ്റെ പഴയ കെട്ടിടം നവീകരിച്ചാണ് സബ് സെൻറർ പ്രവർത്തനത്തിനായി നല്കുക.
വെട്ടൂർ ആയുർവേദ ആശുപത്രിയുടെ പ്രവർത്തനത്തിന് തടസ്സം വരാത്ത നിലയിലായിരിക്കും സബ് സെൻറർ പ്രവർത്തിപ്പിക്കുക. ആവശ്യമായ അടിസ്ഥാന സൗകര്യങ്ങൾ ഗ്രാമ പഞ്ചായത്ത് ഒരുക്കി നല്കും. സ്റ്റാഫിനെ വർക്കിംഗ് അറേൻജ്മെൻ്റിൽ നിയമിക്കും. മലയാലപ്പുഴയിലെ ആളുകൾക്ക് വെട്ടൂർ ആയുർവേദ ആശുപത്രിയിൽ എത്തിച്ചേരാനുള്ള യാത്രാബുദ്ധിമുട്ട് പരിഹരിക്കുന്നതിനാണ് സബ് സെൻറർ അനുവദിച്ചതെന്ന് എം.എൽ.എ പറഞ്ഞു. സബ് സെൻ്റർ ഉടൻ തന്നെ പ്രവർത്തനം ആരംഭിക്കാൻ നടപടി സ്വീകരിക്കുമെന്നും എം.എൽ.എ പറഞ്ഞു.
