കൊച്ചി : നടിയെ ആക്രമിച്ച കേസുമായി ബന്ധപ്പെട്ട് നിര്ണായക പോലീസ് യോഗം അല്പസമയത്തിനകം ചേരും. എ.ഡി.ജി.പി എസ്.ശ്രീജിത്തിന്റെ നേതൃത്വത്തില് പോലീസ് ക്ലബിലാണ് യോഗം ചേരുക. കേസിലെ എട്ടാം പ്രതി ദിലീപിനെതിരെ സുഹൃത്തും സംവിധായകനുമായി ബാലചന്ദ്രകുമാര് നടത്തിയ വെളിപ്പെടുത്തലുകളുടെ പശ്ചാത്തലത്തില് പുതിയ തെളിവുകളിലെ അന്വേഷണം വിലയിരുത്താനാണ് യോഗം. തുടരന്വേഷണം ശക്തമായി മുന്നോട്ട് കൊണ്ടുപോകണമെന്നാണ് സര്ക്കാറിന്റെ നിര്ദേശം. ഇതുപ്രകാരമാണ് യോഗം നടത്തുന്നത്. ക്രൈം ബ്രാഞ്ച് ഐ.ജി എസ്.ഫിലിപ്പ്, എസ്.പി മാരായ കെ.എസ് സുദര്ശനന്, സോജന് തുടങ്ങിവര് പങ്കെടുക്കും.
അതേസമയം നടിയെ ആക്രമിച്ച കേസില് അന്വേഷണം പുതിയ വഴിയിലൂടെ നീങ്ങുകയാണ്. കൊച്ചിയിലെ ഒരു റിക്കോര്ഡിങ് സ്റ്റുഡിയോ കേന്ദ്രീകരിച്ച് അന്വേഷണം നടത്താനാണ് പുതിയ നീക്കം. സംവിധായകന് ബാലചന്ദ്രകുമാറിന്റെ മൊഴിയുടെ അടിസ്ഥാനത്തിലാണ് നടപടി. അതേസമയം നടിയെ ആക്രമിച്ച കേസിലെ ഒന്നാംപ്രതി പള്സര് സുനിയുടെ ജീവന് ജയിലിനുള്ളില് ഭീഷണിയുണ്ടെന്ന പരാതിയെ തുടര്ന്ന് സുനിലിന്റെ അമ്മയുടെ രഹസ്യമൊഴി രേഖപ്പെടുത്താന് അന്വേഷണ സംഘം നിയമോപദേശം തേടി. നിയമോപദേശം ലഭിച്ച ശേഷം കോടതിയെ സമീപിക്കും. സുനി 2018 ല് അമ്മക്ക് എഴുതിയതെന്ന് പറയപ്പെടുന്ന കത്ത് പുറത്തുവന്നിരുന്നു. പള്സര് സുനിയുടെ മാതാവാണ് സുനിക്ക് ജയിലിനുള്ളില് ഭീഷണിയുണ്ടെന്ന് പരാതിപ്പെട്ടത്.
