നേമം: പ്രാവച്ചമ്പലത്ത് റോഡരികില് നിര്ത്തിയിട്ടിരുന്ന ലോറിയില് ഉറങ്ങിയ ഡ്രൈവറെ വെട്ടിപ്പരിക്കേല്പ്പിച്ച് മൊബൈല് ഫോണും പണവും കവര്ന്ന രണ്ടംഗ സംഘത്തിലെ ഒരാളെ പോലീസ് പിടികൂടി. പള്ളിച്ചല് മരുതറത്തല ആയില്യംകാവ് റോഡ് ചാനല്ക്കരവീട്ടില് അര്ഷാദി (24) നെയാണ് നേമം പോലീസ് അറസ്റ്റ് ചെയ്തത്. വ്യാഴാഴ്ച പുലര്ച്ച മൂന്ന് മണിക്കായിരുന്നു സംഭവം. ലോറി ഡ്രൈവര് മേനംകുളം സ്വദേശി ജോണിനെ പ്രതികള് വെട്ടിപ്പരിക്കേല്പ്പിച്ചാണ് മൊബൈല് ഫോണും 6700 രൂപയും കവര്ന്നത്.
ഫോര്ട്ട് അസിസ്റ്റന്റ് കമീഷണര് ഷാജിക്ക് ലഭിച്ച രഹസ്യ വിവരത്തിന്റെ അടിസ്ഥാനത്തില് നേമം എസ്.എച്ച്.ഒ രഗീഷ് കുമാര്, എസ്.ഐ മാരായ വിപിന്, പ്രസാദ്, സുബ്രമണ്യന് പോറ്റി, വിജയന് എ.എസ്.ഐ മാരായ പത്മകുമാര്, ശ്രീകുമാര്, സി.പി.ഒ മാരായ ഗിരി, സജു, ലതീഷ്, റെജിമോന് എന്നിവര് അടങ്ങിയ പോലീസ് സംഘമാണ് അറസ്റ്റ് ചെയ്തത്. പിടിയിലായ അര്ഷാദ് നിരവധി കേസുകളിലെ പ്രതിയാണ്. കോടതിയില് ഹാജരാക്കിയ ഇയാളെ റിമാന്ഡ് ചെയ്തു. രണ്ടാം പ്രതിയെ പിടികൂടാന് പോലീസ് അന്വേഷണം ഊര്ജിതമാക്കിയതായി സിറ്റി പോലീസ് കമീഷണര് അറിയിച്ചു.
