പത്തനംതിട്ട : എഐസിസി ആസ്ഥാനത്ത് പോലീസ് നടത്തിയ അതിക്രമത്തിൽ പ്രതിഷേധിച്ചും കോൺഗ്രസ് നേതാവ് രാഹുൽ ഗാന്ധിയെ കള്ളക്കേസിൽ കുടുക്കുവാനുള്ള എൻഫോഴ്സ്മെന്റ് ഡയറക്ട്രേറ്റിന്റെ നടപടികൾക്കെതിരെയും അഖിേലേന്ത്യാ കോൺഗ്രസ് കമ്മിറ്റിയുടെ ആഹ്വാനം അനുസരിച്ച് ജില്ലാ കോൺഗ്രസ് കമ്മിറ്റിയുടെ നേതൃത്വത്തിൽ ഇന്ന് രാവിലെ 10ന് പത്തനംതിട്ട ഹെഡ് പോസ്റ്റോഫീസിനു മുൻപിൽ പ്രതിഷേധ ധർണ നടത്തുമെന്ന് ഡിസിസി ജനറൽ സെക്രട്ടറി സാമുവൽ കിഴക്കുപുറം അറിയിച്ചു.
കെപിസിസി രാഷ്ട്രീയ കാര്യസമിതി അംഗം പ്രൊഫ. പി.ജെ.കുര്യൻ ധർണ ഉദ്ഘാടനം ചെയ്യും. ഡിസിസി പ്രസിഡന്റ് പ്രൊഫ. സതീഷ് കൊച്ചുപറമ്പിൽ അധ്യക്ഷത വഹിക്കും. കെപിസിസി, ഡിസിസി, പോഷക സംഘടനാ നേതാക്കൾ നേതൃത്വം നൽകും. കോൺഗ്രസിന്റെ ബൂത്ത് തലം മുതലുള്ള ഭാരവാഹികൾ, പോഷക സംഘടനാ നേതാക്കൾ, ത്രിതല പഞ്ചായത്ത്, മുനിസിപ്പൽ ജന പ്രതിനിധികൾ എന്നിവർ പങ്കെടുക്കും. പ്രതിഷേധ ധർണയിൽ പങ്കെടുക്കുവാനുള്ള ഭാരവാഹികളും പ്രധാന നേതാക്കളും പ്രവർത്തകരും രാവിലെ 10ന് മുമ്പായി പത്തനംതിട്ട സെൻട്രൽ ജംഗ്ഷനിൽ എത്തിച്ചേരണമെന്ന് ഡിസിസി ജനറൽ സെക്രട്ടറി അഭ്യർത്ഥിച്ചു.
