ദുബായ് : സ്കൂള് തുറക്കുന്നതിന് മുന്നോടിയായി റീട്ടെയില് ഷോപ്പുകളില് പരിശോധന കര്ശനമാക്കി ദുബായ്. എണ്ണൂറില് അധികം കടകളില് പരിശോധന നടത്താനാണ് നീക്കം. ഓണ്ലൈന് വിപണിയിലും പരിശോധന കര്ശനമാക്കും. പുതിയ അധ്യായന വര്ഷം തുടങ്ങാന് വിരലിലെണ്ണാവുന്ന ദിവസങ്ങള് മാത്രം ബാക്കി നില്ക്കെ സ്കൂള് വിപണി സജീവമാവുകയാണ്.ബാക്ക് ടു സ്കൂള് ക്യാമ്പയിനുകളും ഓഫറുകളുമായി വിവിധ സൂപ്പര്മാര്ക്കറ്റുകളും, സ്റ്റേഷനറി കടകളും ഉപഭോക്താക്കളെ ആകര്ഷിക്കുന്നു. കുടുംബങ്ങള്ക്ക് ഏറ്റവും തിരക്കേറിയ ഷോപ്പിംഗ് കാലമാണിത്. ദുബായ് കോര്പ്പറേഷന് ഫോര് കണ്സ്യൂമര് പ്രൊട്ടക്ഷന് ആന്ഡ് ഫെയര് ട്രേഡിന്റെ നേതൃത്വത്തില് 800 ലധികം പരിശോധനകള് നടത്താനാണ് നീക്കം.
ദിവസങ്ങള്ക്കു മുന്പ് തന്നെ പരിശോധനകള് ആരംഭിച്ചു കഴിഞ്ഞു. ഒരു കേന്ദ്രത്തില് ഒറ്റത്തവണ മാത്രം പരിശോധന നടത്തുന്ന രീതിയല്ല ഇത്തവണയുള്ളതെന്ന് അധികൃതര് പറയുന്നു. പരസ്യപ്പെടുത്തിയിരിക്കുന്ന ഓഫറുകള് യഥാര്ത്ഥമാണോ എന്ന് പരിശോധിക്കും. ഉല്പ്പന്നങ്ങളുടെ ഗുണനിലവാരം, വില, തുടങ്ങി ഓരോന്നും രേഖപ്പെടുത്തും.എക്സ്ചേഞ്ച്, റീഫണ്ട് നയങ്ങളും, പ്രമോഷണല് കാമ്പെയ്നുകള്ക്കിടയില് ഉപഭോക്താക്കളെ തെറ്റിദ്ധരിപ്പിക്കുന്ന രീതികളും നിരീക്ഷിക്കുന്നുണ്ട്. വിവിധ ഓണ്ലൈന് പ്ലാറ്റ്ഫോമുകളുടെ വിപണിയും പരിശോധനയ്ക്ക് വിധേയമാക്കുന്നുണ്ട്.
ബാക്ക്-ടു-സ്കൂള് പ്രമോഷനുകളുടെ സമയത്ത് ഷോപ്പിംഗ് നടത്തുന്ന കുടുംബങ്ങള് കിഴിവും സാധനങ്ങളുടെ ഗുണമേന്മയും ഉറപ്പുവരുത്തണമെന്ന് അതോറിറ്റി ആവശ്യപ്പെട്ടു.പണം നല്കുന്നതിനുമുമ്പ് എക്സ്ചേഞ്ച്, റിട്ടേണ് വ്യവസ്ഥകള് പരിശോധിക്കുകയും ശേഷം രസീതുകളും വാറന്റി രേഖകളും സൂക്ഷിക്കുകയും വേണം.
