പൂപ്പാറ : ബോഡിനായ്ക്കന്നൂരിനു സമീപം പെരിയത്തുകോംബെ നദിയില് കുളിക്കാനിറങ്ങിയ നവദമ്പതികള് ഉള്പ്പെടെ 3 പേര് മുങ്ങി മരിച്ചു. സുബ്ബരാജ് നഗര് പുതുക്കോളനിയിലെ രാജ (30), ഭാര്യ കോയമ്പത്തൂര് സ്വദേശി കാവ്യ (20), സഞ്ജയ് (24) എന്നിവരാണു മരിച്ചത്. ഒരു മാസം മുമ്പായിരുന്നു രാജയുടെയും കാവ്യയുടെയും വിവാഹം. ഇരുവരും സഞ്ജയുടെ വീട്ടില് വിരുന്നിന് എത്തിയതാണ്. ഇന്നലെ രാവിലെ നദിയില് കുളിക്കാനിറങ്ങിയപ്പോള് രാജയും കാവ്യയും പാറയില് കാല്വഴുതി വെള്ളത്തില് വീണു.
ഒഴുക്കില്പെട്ട ദമ്പതികളെ രക്ഷിക്കാന് ഇറങ്ങിയപ്പോള് സഞ്ജയും അപകടത്തില്പെടുകയായിരുന്നു. പോലീസും ഫയര്ഫോഴ്സും തിരച്ചില് നടത്തിയാണു മൃതദേഹങ്ങള് കണ്ടെത്തിയത്. ലണ്ടനിലായിരുന്ന സഞ്ജയ് ഏതാനും ദിവസങ്ങള്ക്കു മുമ്പാണു നാട്ടിലേക്കെത്തിയത്.
