കൊച്ചി : കേരളത്തിന്റെ അടുത്ത മുഖ്യമന്ത്രി സ്ഥാനത്തേക്ക് എഐസിസി ജനറൽ സെക്രട്ടറി കെ.സി വേണുഗോപാലിന് പരസ്യ പിന്തുണയുമായി കെപിസിസി ജനറൽ സെക്രട്ടറി ദീപ്തി മേരി വർഗീസ് രംഗത്ത്. മുഖ്യമന്ത്രി സ്ഥാനത്തേക്ക് ആരുടെയും പേരുകൾ നിർദ്ദേശിക്കരുതെന്ന കെപിസിസി നേതൃത്വത്തിന്റെ കർശന വിലക്ക് നിലനിൽക്കെയാണ് ദീപ്തിയുടെ ഈ വെളിപ്പെടുത്തൽ. കെ.സി വേണുഗോപാൽ നിലവിൽ എംഎൽഎ അല്ലെങ്കിലും മുൻപും എംഎൽഎ അല്ലാത്തവർ മുഖ്യമന്ത്രിയായിട്ടുണ്ടെന്ന കാര്യം ദീപ്തി ഓർമ്മിപ്പിച്ചു. മുഖ്യമന്ത്രിയെ നിശ്ചയിക്കുന്നതിൽ എംഎൽഎമാരുടെ അഭിപ്രായം നിർണ്ണായകമാണെന്നും അവർ അഭിപ്രായപ്പെട്ടു.
ഇക്കഴിഞ്ഞ തിരഞ്ഞെടുപ്പിൽ കേരളത്തിലെ 140 മണ്ഡലങ്ങളിലും കേന്ദ്രീകരിച്ച് പ്രവർത്തിച്ച നേതാവാണ് കെ.സി വേണുഗോപാൽ. ഏറ്റവും കൂടുതൽ മണ്ഡലങ്ങളിൽ നേരിട്ടെത്തി പ്രചാരണം നടത്തിയതും എഐസിസിയുടെ എല്ലാവിധ സഹായങ്ങളും മണ്ഡലങ്ങളിലേക്ക് എത്തിക്കാൻ നേതൃത്വം നൽകിയതും അദ്ദേഹമാണെന്ന് ദീപ്തി വ്യക്തമാക്കി. മുഖ്യമന്ത്രി സ്ഥാനത്തേക്ക് രമേശ് ചെന്നിത്തല, വി.ഡി സതീശൻ എന്നിവരുടെ പേരുകളും സജീവമായി പരിഗണനയിലുണ്ട്. ഇവർ മൂന്നുപേരും ഒരുപോലെ യോഗ്യരാണെങ്കിലും വേണുഗോപാലിന്റെ പ്രവർത്തനമികവ് എടുത്തു പറയേണ്ടതാണെന്ന് അവർ സൂചിപ്പിച്ചു.
