ന്യൂഡല്ഹി : കൊവിഡ് ബാധിച്ച് ചികിത്സയില് കഴിയുന്ന ഡല്ഹി ആരോഗ്യ മന്ത്രി സത്യേന്ദര് ജയിനിന്റെ ആരോഗ്യനില വഷളായി. അദ്ദേഹത്തിന് ന്യൂമോണിയ ബാധിച്ചതായും കടുത്ത ശ്വാസതടസ്സം അനുഭവപ്പെടുന്നതായും റിപ്പോര്ട്ടുകള് പറയുന്നു. അദ്ദേഹത്തിന്റെ ആരോഗ്യ നില തുടര്ച്ചയായി നിരീക്ഷിച്ചുവരികയാണെന്ന് ഡല്ഹി രാജീവ് ഗാന്ധി ആശുപത്രിയിലെ ഡോക്ടര്മാര് അറിയിച്ചു.
രണ്ട് ദിവസം മുമ്പാണ് സത്യേന്ദര് ജയിനിന് കൊവിഡ് സ്ഥിരീകരിച്ചത്. ശ്വസനസംബന്ധമായ ബുദ്ധിമുട്ടുകള് അനുഭവപ്പെട്ടതിനെ തുടര്ന്ന് പരിശോധനക്ക് വിധേയനാക്കുകയായിരുന്നു. തുടര്ന്ന് വ്യാഴാഴ്ചയാണ് രാജീവ്ഗാന്ധി ആശുപത്രിയില് പ്രവേശിപ്പിച്ചത്. കടുത്ത പനിയും ശ്വാസ തടസ്സവും അനുഭവപ്പെട്ടതിനെ തുടര്ന്ന് താന് ആശുപത്രിയില് പ്രവേശിപ്പിക്കപ്പെട്ടതായി അദ്ദേഹം തന്നെയാണ് ട്വീറ്റ് ചെയ്തത്. തൊട്ടടുത്ത ദിവസം പരിശോധനാ ഫലം പോസിറ്റീവായ കാര്യവും അദ്ദേഹം തന്നെ ട്വീറ്റ് ചെയ്തു. സത്യേന്ദ്ര ജയിന് ആശുപത്രിയില് പ്രവേശിപ്പിക്കപ്പെട്ടതിനെ തുടര്ന്ന് ഡല്ഹി ഉപമുഖ്യമന്ത്രി മനീഷ് സിസോദിയക്ക് ആരോഗ്യ വകുപ്പിന്റെ അധിക ചുമതല നല്കിയിരുന്നു.
