റാന്നി: നാം ഒന്നാണെന്ന സന്ദേശമാണ് ഓണമെന്ന് ഡെപ്യൂട്ടി സ്പീക്കര് ചിറ്റയം ഗോപകുമാര്. പെരുനാട് പഞ്ചായത്തിന്റെ നേതൃത്വത്തില് ആരംഭിച്ച പൈതൃക ഫെസ്റ്റിന്റെ ഭാഗമായ കലാസന്ധ്യയുടെ ഉദ്ഘാടനം നിര്വ്വഹിച്ചു സംസാരിക്കുകയായിരുന്നു അദ്ദേഹം. തൊട്ടുകൂടായ്മയും തീണ്ടികൂടായ്മയുടെയും കാലത്തിന് ഉള്ള മറുപടിയാണ് മാവേലി തമ്പുരാന്റെ ഭരണകാലമെന്നും ഓണം ഈ നല്ലനാളിന്റെ ഓർമപ്പെടുത്തലാണെന്നും അദ്ദേഹം അഭിപ്രായപ്പെട്ടു. പരമ്പരാഗത ഓണത്തിന്റെ പുനരാവിഷ്കാരം ലക്ഷ്യം വെച്ച് റാന്നി പെരുനാട് ഗ്രാമപഞ്ചായത്തിന് നേതൃത്വത്തിൽ ആരംഭിച്ച പെരുനാട് പൈതൃക ഫെസ്റ്റിനു തുടക്കമായി. നൂറു കണക്കിന് ആളുകൾ അണിനിരന്ന വിളംബര ഘോഷയാത്രയോടെ ആരംഭിച്ച ചടങ്ങ് വേഗവരയുടെ മാന്ത്രികൻ ജിതേഷ് ജി ഉദ്ഘാടനം നിർവഹിച്ചു.
ഗ്രാമപഞ്ചായത്ത് പ്രസിഡന്റ് പി എസ് മോഹനൻ ആദ്യക്ഷത വഹിച്ചു. റാന്നി എം എൽ എ അഡ്വ. പ്രമോദ് നാരായൺ, ബ്ലോക്ക് പഞ്ചായത്ത് പ്രസിഡണ്ട് കെ എസ് ഗോപി, കേരള നോളേജ് ഇക്കണോമി ഡയറക്ടർ ഡോ. പി എസ് ശ്രീകല, ഗ്രാമപഞ്ചായത്ത് വൈസ് പ്രസിഡണ്ട് ഡി ശ്രീകല, സി എസ് സുകുമാരൻ, സെക്രട്ടറി വി സുരേഷ് കുമാർ, വി എൻ പി ധരൻ, ഡി ബിന്ദു, എൻ ജിജി തുടങ്ങിയവർ സംസാരിച്ചു. മേളയുടെ ഭാഗമായി 500ൽ പരം പൈതൃക്ക ഉൾപ്പന്നങ്ങളുടെ പ്രദർശനം, ഓണം വിപണന മേള എന്നിവ സെപ്റ്റംബർ 3 വരെ തുടരും.
