കൊച്ചി : ദിലീപിന്റെ ഫോണുകള് തിരുവനന്തപുരം ഫോറന്സിക് ലാബില് പരിശോധിക്കാന് ഉത്തരവിടണമെന്ന് ചൂണ്ടിക്കാട്ടി ക്രൈം ബ്രാഞ്ച് ആലുവ ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയില് അപേക്ഷ നല്കി. ശബ്ദ പരിശോധന ആവശ്യമാണെന്നും ക്രൈം ബ്രാഞ്ച് കോടതിയെ അറിയിച്ചു. ഫോണുകള് ആര്ക്ക് കൈമാറണമെന്ന കാര്യത്തില് കീഴ്ക്കോടതി തീരുമാനമെടുക്കണമെന്ന് ഇന്നലെ ഹൈക്കോടതി ഉത്തരവിട്ടിരുന്നു. ഇതുപ്രകാരമാണ് ദിലീപിന്റേയും സഹോദരന്റേയും സഹോദരി ഭര്ത്താവിന്റേയും ഫോണുകള് ഫോറന്സിക് ലാബില് പരിശോധിക്കാന് അന്വേഷണ സംഘം ആവശ്യപ്പെട്ടിരിക്കുന്നത്.
- ഫോണുകള് സംസ്ഥാന സര്ക്കാരിന് കീഴിലെ ലാബില് പരിശോധിക്കുന്നതിനെ പ്രതിഭാഗം എതിര്ക്കുമെന്നാണ് റിപ്പോര്ട്ട്. ദിലീപിന്റെ മുന്കൂര് ജാമ്യാപേക്ഷ പരിഗണിക്കുന്നത് നാളത്തേക്ക് മാറ്റി. ഫോണ് അണ്ലോക്ക് പാറ്റേണ് കോടതിക്ക് നല്കാന് പ്രതികള്ക്ക് നിര്ദേശം നല്കിയിരുന്നു. ദിലീപിന്റെ മറ്റ് ഫോണുകള് ഹാജരാക്കാനും നിര്ദേശം നല്കണമെന്ന് പ്രോസിക്യൂഷന് ആവശ്യപ്പെട്ടു. ആറ് ഫോണുകളില് അഞ്ചെണ്ണം തിരിച്ചറിഞ്ഞു. പുതിയ ഫോണുകള് കൂടി കണ്ടെത്തിയിട്ടുണ്ടെന്ന് ഡി ജി പി ഹൈക്കോടതിയെ അറിയിച്ചു.
