കൊച്ചി : നടിയെ ആക്രമിച്ച കേസില് ദൃശ്യങ്ങള് ചോര്ന്നത് കോടതിയില് നിന്ന് തന്നെയാണെന്ന് പ്രോസിക്യൂഷന്. ആക്രമണ ദൃശ്യങ്ങള് അടങ്ങിയ പെന്ഡ്രൈവ് പരിശോധിച്ചപ്പോഴാണ് ദൃശ്യം ചോര്ന്നുവെന്ന് വ്യക്തമായതെന്ന് പ്രോസിക്യൂഷന് റിപ്പോര്ട്ടില് പറയുന്നു. ഇതു സംബന്ധിച്ച് ക്രൈംബ്രാഞ്ച് തയ്യാറാക്കിയ റിപ്പോര്ട്ട് പ്രോസിക്യൂഷന് വിചാരണക്കോടതിക്ക് കൈമാറി. തിരുവനന്തപുരത്തെ ഫൊറന്സിക് ലാബിലാണ് പെന്ഡ്രൈവ് പരിശോധിച്ചത്.
പെന്ഡ്രൈവ് കോടതിയുടെ കസ്റ്റഡിയിലായിരുന്ന കാലയളവിലാണ് ദൃശ്യങ്ങള് ചോര്ന്നിരിക്കുന്നത്. പല ഘട്ടങ്ങളിലായി മൂന്ന് കോടതികളില് പെന്ഡ്രൈവ് സൂക്ഷിച്ചിരുന്നു. ആലുവ, അങ്കമാലി മജിസ്ട്രേറ്റ് കോടതികളിലും, അഡീഷണല് സെഷന്സ് കോടതിയിലുമായിട്ടായിരുന്നു ദൃശ്യം സൂക്ഷിച്ചിരുന്നത്. എന്നാല് ഇതില് ഏത് കോടതിയില് നിന്നാണ് ദൃശ്യം ചോര്ന്നതെന്ന കാര്യത്തില് കൃത്യമായ വ്യക്തത പോലീസിനില്ല. എവിടെ നിന്നാണ് ചോര്ന്നതെന്ന് കണ്ടെത്തണമെന്നും റിപ്പോര്ട്ടില് പറയുന്നു.
