ന്യൂഡല്ഹി: കോക്രോച്ച് ജനതാ പാര്ട്ടി (സിജെപി) രൂപപ്പെട്ട മാതൃകയില് സമൂഹമാധ്യമങ്ങളില് അതിവേഗം പ്രചാരം നേടുകയാണ് പുതിയൊരു പാര്ട്ടി. ‘ദിമാഗി നക്സല് പാര്ട്ടി’ എന്ന പേരിലുള്ള പേജാണ് സമൂഹമാധ്യമങ്ങളില് പ്രത്യക്ഷപ്പെട്ടത്. സ്വാതന്ത്ര്യ ദിനത്തില് രാഷ്ട്രീയ എതിരാളികളെ ലക്ഷ്യമിട്ട് പ്രധാനമന്ത്രി നരേന്ദ്ര മോദി നടത്തിയ ‘ദിമാഗി നക്സല്’ പ്രയോഗത്തിന് പിന്നാലെയാണ് പുതിയ ‘പാര്ട്ടി’യുടെ ഉദയം. അമ്പതിനായിരത്തിലേറെ ഫോളോവേഴ്സിനെ ‘ദിമാഗി നക്സല് പാര്ട്ടി’ ഒറ്റദിവസം കൊണ്ട് നേടിയിട്ടുണ്ട്. സ്ഥാപകന്റെ പേര് ‘ഒരു ദിമാഗി ഇന്ത്യക്കാരന്’ എന്നാണ് നല്കിയിരിക്കുന്നത്. ‘ചിന്തിക്കുക, ഗവേഷണം ചെയ്യുക, പ്രതിരോധിക്കുക’ എന്നിവയാണ് പാര്ട്ടിയുടെ ആപ്തവാക്യങ്ങളായി കൊടുത്തിരിക്കുന്നത്. പേജിന് പിന്നിലുള്ളതാരാണെന്ന് വ്യക്തമല്ല. കേന്ദ്ര സര്ക്കാരിന്റെ പല നയങ്ങളെയും ചോദ്യംചെയ്തുകൊണ്ടുള്ള പോസ്റ്റുകളാണ് പേജില് പ്രത്യക്ഷപ്പെടുന്നത്.
ഇന്നലെ ചെങ്കോട്ടയിലെ സ്വാതന്ത്ര്യദിന പ്രസംഗത്തിലാണ് മോദി ‘ദിമാഗി നക്സല്’ പ്രയോഗം നടത്തിയത്. ‘സായുധരായ നക്സലുകളെ ഇല്ലാതാക്കാന് കഴിഞ്ഞു, എന്നാല് തലച്ചോറില് നക്സലിസം ശേഷിക്കുന്നവര് ഇന്ത്യയില് ഇപ്പോഴും തുടരുന്നു’ എന്നാണ് രാഷ്ട്രീയ എതിരാളികളെ ലക്ഷ്യമിട്ട് മോദി പറഞ്ഞത്. സായുധ നക്സലിസം രാജ്യത്തുനിന്ന് തുടച്ചുനീക്കപ്പെട്ടെങ്കിലും സമൂഹത്തില് അശാന്തിയും അക്രമവും സൃഷ്ടിക്കാന് ‘ദിമാഗി നക്സലുകള്’ ഇപ്പോഴും ശ്രമിക്കുന്നുണ്ടെന്നും അത്തരത്തിലുള്ളവരെ തിരിച്ചറിഞ്ഞ് ഒറ്റപ്പെടുത്തണമെന്നുമായിരുന്നു പ്രധാനമന്ത്രിയുടെ ആഹ്വാനം. പ്രസ്താവനക്കെതിരെ കോണ്ഗ്രസ് രൂക്ഷ വിമര്ശനം നടത്തിയിരുന്നു.
