നെയ്യാറ്റിൻകര : എസ്ഐയ്ക്കെതിരെ പരാതിയുമായി പോലീസുകാരൻ. വാഹന പരിശോധനയ്ക്കിടെ മക്കളുടെ മുന്നിൽ അപമര്യാദയായി പെരുമാറിയെന്നാണ് ആക്ഷേപം. കാഞ്ഞിരംകുളം പോലീസ് സ്റ്റേഷനിലെ ഗ്രേഡ് എസ്ഐക്കെതിരെ സിറ്റി കൺട്രോൾ റൂമിലെ സീനിയർ സിവിൽ പോലീസ് ഓഫിസർ നെല്ലിമൂട് കൈവൻവിള ജോബിൻ നിവാസിൽ എസ്. വിനു മുഖ്യമന്ത്രിക്കും ഉന്നത പോലീസ് ഉദ്യോഗസ്ഥർക്കും പരാതി നൽകി.
വിനുവിന്റെ ഭാര്യ സമീപകാലത്താണു കോവിഡ് ബാധിച്ചു മരിച്ചത്. പലപ്പോഴും മക്കളെ മറ്റൊരിടത്താക്കിയ ശേഷമാണ് ജോലിക്കു പോകുന്നത്. ലോക്ക്ഡൗൺ കാലത്ത് ഇത്തരത്തിലുള്ള യാത്രാമധ്യേയാണ് കാഞ്ഞിരംകുളം സ്റ്റേഷനിലെ ഗ്രേഡ് എസ്ഐ തന്നോട് മോശമായി പെരുമാറിയതെന്നു പരാതിയിൽ പറഞ്ഞു. താൻ പോലീസുകാരനാണെന്ന് അറിയിച്ചിട്ടും പെരുമാറ്റത്തിൽ മയമുണ്ടായിരുന്നില്ല.
വാഹനം പിടിച്ചെടുക്കുമെന്നും ജോലി തെറിപ്പിക്കുമെന്നും ഭീഷണിപ്പെടുത്തിയെന്നും പരാതിയിലുണ്ട്. മക്കളുടെ മുന്നിൽ അപമാനിക്കപ്പെട്ടത് മാനസികമായി തളർത്തി. ബന്ധുവിന്റെ വാഹനം പിടിച്ചെടുത്തതുമായി ബന്ധപ്പെട്ട മറ്റൊരു കേസിന് കാഞ്ഞിരംകുളം പോലീസ് സ്റ്റേഷനിൽ പോയപ്പോഴും വളരെ മോശം പ്രതികരണമാണ് പോലീസുകാരുടെ ഭാഗത്തു നിന്നുണ്ടായതെന്നും പരാതിയിൽ വിശദീകരിച്ചിട്ടുണ്ട്.
