മല്ലപ്പള്ളി : പത്താമത് ജില്ലാ പുസ്തകമേള – എജ്യുഫെസ്റ്റ് സമാപിച്ചു. ക്ഷേത്ര പ്രവേശന വിളംബര സ്മാരക ശ്രീ ചിത്തിര തിരുനാൾ സാംസ്കാരിക സമിതിയുടെ ആഭിമുഖ്യത്തിൽ ജില്ലയിലെ ത്രിതല പഞ്ചായത്തുകളുടെയും ഇതര സംഘടനകളുടെയും സഹകരണത്തോടെയാണ് പരിപാടി നടത്തിയത്. മല്ലപ്പള്ളി – തിരുവല്ല റോഡിലെ വലിയപ്ലാവുങ്കൽ ഹാളിൽ ശനിയാഴ്ച വൈകിട്ട് ചേർന്ന സമാപന യോഗം ജില്ലാ പഞ്ചായത്ത് അംഗം ഡോ. ബിജു ടി.ജോർജ് ഉദ്ഘാടനം ചെയ്തു. മാനവികതയുടെ ആത്മാംശമായ അക്ഷരങ്ങളോട് ചേർന്ന് നിൽക്കാൻ പര്യാപ്തമാക്കുന്ന പുസ്തകമേളകൾ കാലഘട്ടത്തിൻ്റെ ആവശ്യമെന്ന് അദ്ദേഹം പറഞ്ഞു.
സമിതി കൺവീനറും ബ്ലോക്ക് പഞ്ചായത്ത് വൈസ് പ്രസിഡന്റുമായ എബി മേക്കരിങ്ങാട്ട് അധ്യക്ഷത വഹിച്ചു. മേളയിൽ നിന്ന് പുസ്തകങ്ങൾ വാങ്ങിയവരുടെ കൂപ്പണുകൾ നറുക്കെടുത്ത് ആയിരത്തിലധികം രൂപയുടെ പുസ്തകങ്ങൾ സമ്മാനമായി നൽകി. സമിതി കൺവീനർമാരായ കെ. ആർ. പ്രദീപ് കുമാർ, മധു ചെമ്പു കുഴി, കൈറ്റ് ജില്ലാ മുൻ കോ-ഓർഡിനേറ്റർ വി. സുദേവ്കുമാർ തുടങ്ങിയവർ പ്രസംഗിച്ചു.
