പത്തനംതിട്ട : വെള്ളപ്പൊക്കം, ഉരുള്പൊട്ടല് തുടങ്ങിയ പ്രകൃതിക്ഷോഭങ്ങളെ തുടര്ന്ന് ജില്ലയില് തകര്ച്ച നേരിട്ട റോഡുകള്, ദുരന്തനിവാരണ ഫണ്ട് വിനിയോഗിച്ച് പുനരുദ്ധരിക്കുന്ന പ്രവൃത്തികളുടെ തത്സമയ നിരീക്ഷണത്തിന് വെബ് പോര്ട്ടലുമായി ജില്ല ദുരന്ത നിവാരണ അതോറിറ്റി. ഭരണാനുമതി മുതല് കരാറുകാരന് തുക അനുവദിക്കുന്നത് വരെയുള്ള ഘട്ടങ്ങള് ഏകീകൃതമായി ലഭ്യമല്ലാതിരുന്ന പ്രശ്നത്തിന് പരിഹാരമായാണ് പോര്ട്ടല് രൂപകല്പ്പന ചെയ്തത്. പോര്ട്ടലിന്റെ ഉദ്ഘാടനം കളക്ടറേറ്റ് ഗവി കോണ്ഫറന്സ് ഹാളില് റവന്യൂ വകുപ്പ് മന്ത്രി എ.പി അനില്കുമാര് നിര്വഹിച്ചു.
ഭരണാനുമതി മുതല് ബില് തുക അനുവദിക്കല് വരെയുള്ള 12 ഘട്ടങ്ങള് തത്സമയം ട്രാക്ക് ചെയ്യാനാകും. സമഗ്ര ഡാഷ്ബോര്ഡ്, ഫില്ട്ടറുകള്, റിപ്പോര്ട്ടുകള്, രേഖകള് തുടങ്ങിയവ പോര്ട്ടലിലുണ്ടാകും. നിയോജക മണ്ഡലത്തിലെ പ്രവര്ത്തികളുടെ പുരോഗതി എം.എല്.എമാര്ക്ക് നേരിട്ട് വീക്ഷിക്കുവാന് കഴിയും. നിര്വഹണ ഏജന്സി, എം.എല്.എ, സൂപ്പര് അഡ്മിന്, അഡ്മിന് എന്നിങ്ങനെ നാലുതലങ്ങളില് സുരക്ഷിത ലോഗിന് സംവിധാനമുണ്ട്. കളക്ടറേറ്റ് ദുരന്തനിവാരണ വിഭാഗം ജൂനിയര് സൂപ്രണ്ട് അജിത് ശ്രീനിവാസാണ് സുതാര്യതയും വേഗതയും ഉറപ്പാക്കുന്ന മാതൃക വികസിപ്പിച്ചത്.
