കോഴഞ്ചേരി : ജില്ല പഞ്ചായത്ത് 20 ലക്ഷം രൂപ ചെലവഴിച്ച് നവീകരിക്കുന്ന പാലയ്ക്കാട്ടുചിറ-ചിറയിറമ്പ്-തിരുവഞ്ചാംകാവ് റോഡുകളുടെ നിർമാണം ആരംഭിച്ചു. തോട്ടപ്പുഴശ്ശേരി ഗ്രാമപഞ്ചായത്തിന്റെ ഏഴ്, എട്ട്, 12 വാർഡുകളിൽ ഉൾപ്പെടുന്ന റോഡിന്റെ റീടാറിങ്, ഐറിഷ് ഡ്രെയിൻ, പുനരുദ്ധാരണം എന്നിവയാണ് നടക്കുന്നത്. ജില്ല പഞ്ചായത്ത് വൈസ് പ്രസിഡന്റ് ജോർജ്ജ് മാമ്മൻ കൊണ്ടുരിന്റെ നിർദേശത്തെ തുടർന്ന് പൊതുമരാമത്ത് വികസന ഫണ്ടിൽനിന്നാണ് ജില്ല പഞ്ചായത്ത് തുക അനുവദിച്ചത്.
ചെട്ടിമുക്ക്-തോണിപ്പുഴ റോഡിൽ തിരുവഞ്ചാംകാവ് ക്ഷേത്രം മുതൽ ചിറയിറമ്പ് ജങ്ഷൻവരെയും പാലയ്ക്കാട്ടുചിറ മുതൽ തിരുവഞ്ചാംകാവ് വരെയുമാണ് സഞ്ചാരയോഗ്യമാക്കുന്നത്. നാലുമണിക്കാറ്റ് പദ്ധതിയിലൂടെ ജില്ല പഞ്ചായത്ത് ആരംഭിച്ച വഴിയോര വിശ്രമകേന്ദ്രത്തിലേക്കും ഗ്രാമപഞ്ചായത്തിന്റെ പ്രധാന നെല്ലറയായ നെടുമ്പ്രയാർ പുഞ്ചയിലേക്കുമുള്ള പ്രധാന പാതകളാണിവ. ഇരുറോഡിൻെറയും നിർമാണം പൂർത്തിയാകുന്നതോടെ പ്രദേശവാസികളുടെ യാത്രദുരിതത്തിനും പരിഹാരമാകും.
