കൊച്ചി : പാര്ട്ടികളില് മയക്ക് മരുന്ന് ഉപയോഗം തടയാന് നടപടി ഡി ജെ പാര്ട്ടികള് നടത്തുന്ന ഹോട്ടലുകള്ക്ക് മുന്നറിയിപ്പ് നോട്ടീസ് നല്കാന് തീരുമാനിച്ചു. ലഹരി മാഫിയകള് ഡി ജെ പാര്ട്ടികള് കേന്ദ്രീകരിച്ച് പ്രവര്ത്തിക്കുന്നുവെന്ന കണ്ടെത്തലുകളുടെ അടിസ്ഥാനത്തിലാണ് പാര്ട്ടികളില് നിയന്ത്രണമേര്പ്പെടുത്താന് നീക്കം. ഡിജെ പാര്ട്ടികളില് ഹോട്ടല് ഉടമകള്ക്ക് ഉത്തരവാദിത്തമുണ്ടായിരിക്കും. പാര്ട്ടിക്കിടെ മയക്ക് മരുന്ന് ഉപയോഗം തടയാന് നടപടി ഹോട്ടല് ഉടമകള് എടുക്കണം.
ഡി ജെ പാര്ട്ടിയില് വെച്ച് മയക്കുമരുന്ന് പിടികൂടിയാല് ഹോട്ടല് ഉടമകളും സ്വമേധയാ പ്രതികളാവും. പോലീസ് ആക്ടിലെ 67 വകുപ്പ് പ്രകാരമാണ് ഹോട്ടല് ഉടമകള്ക്ക് നോട്ടീസ് നല്കുക. നര്കോട്ടിക്സ് കണ്ട്രാള് ബ്യൂറോയുടെ കേസുകളിലും നോട്ടീസ് ബാധകമാകും. ഇതുമായി ബന്ധപ്പെട്ട നടപടികള് പോലീസ് തുടങ്ങി കഴിഞ്ഞു. സ്ഥിരം ഡിജെ പാര്ട്ടി നടത്തുന്ന ഹോട്ടലുകളുടെ പട്ടിക പോലീസ് ശേഖരിച്ചിട്ടുണ്ട്. ഈ ഹോട്ടലുകള്ക്കാണ് ആദ്യം നോട്ടീസ് നല്കുക.
കൊച്ചിയില് അപകടത്തില് മരിച്ച മോഡലുകള് പങ്കെടുത്ത പാര്ട്ടിയുമായി ബന്ധപ്പെട്ട് നടത്തിയ അന്വേഷണത്തിന് പിന്നാലെയാണ് ഡിജെ പാര്ട്ടികളെയും ലഹരിമാഫിയകളുടെയും നിയന്ത്രിക്കാന് പോലീസ് നീക്കം തുടങ്ങിയത്. ഡിജെ പാര്ട്ടികളുടെ മറവില് നടക്കുന്ന ലഹരി ഇടപാട് പൂര്ണമായും പുറത്ത് കൊണ്ടുവരികയാണ് പോലീസിന്റെ ലക്ഷ്യം. ഇതിന് വഴിതെളിയിച്ചത് മോഡലുകളുടെ മരണത്തില് അറസ്റ്റിലായ പ്രതി സൈജു തങ്കച്ചന്റെ മൊബൈല് ഫോണിലെ ദൃശ്യങ്ങളാണ്. സ്ത്രീകള് ഉല്പ്പെടെ ലഹരി പാര്ട്ടികളില് പങ്കെടുക്കുന്നതിന്റെ നിരവധി ദൃശ്യങ്ങള് പോലീസിന് നേരത്തെ ലഭിച്ചിരുന്നു.
