ന്യൂഡല്ഹി: ഡോക്ടേഴ്സ് ദിനത്തില് ഇന്ത്യയിലും വിവിധ രാജ്യങ്ങളിലുമുള്ള ഇന്ത്യന് നഴ്സുമാരുമായി സംവദിച്ച് കോണ്ഗ്രസ് നേതാവ് രാഹുല് ഗാന്ധി. ആരോഗ്യപ്രവര്ത്തകര്ക്ക് ഹൃദയംഗമമായ നന്ദി അറിയിച്ച അദ്ദേഹം അവരുടെ ജോലിയുമായി ബന്ധപ്പെട്ട കാര്യങ്ങളും അന്വേഷിച്ചു. അനുഭവജ്ഞാനത്തിന്റെ വെളിച്ചത്തില് കോവിഡ് പ്രതിസന്ധിയെ എങ്ങനെ മറികടക്കാം എന്ന് നഴ്സുമാര് ചര്ച്ചയില് വിശദീകരിച്ചു.
ഡല്ഹി എയിംസില് നിന്നും മലയാളി കൂടിയായ നഴ്സ് വിപിന് കൃഷ്ണന്, ന്യൂസിലന്ഡില് നിന്നും അനു രാഗ്നാഥ്, ആസ്ത്രേലിയയില് നിന്നും നരേന്ദ്ര സിങ്, ബ്രിട്ടണില് നിന്നും ഷെല്ലിമോള് എന്നിവരാണ് ചര്ച്ചയില് പങ്കെടുത്തത്.
സ്വകാര്യ ആശുപത്രികളില് ജോലിചെയ്യുന്ന നഴ്സുമാരുടെ ശമ്പളം വെട്ടിക്കുറന്നതിലുള്ള പരിഭവമായിരുന്നു ഡല്ഹി എയിംസില് ജോലിചെയ്യുന്ന മലയാളിയായ വിപിന് കൃഷ്ണക്ക് പറയാനുണ്ടായിരുന്നത്. ഭാര്യക്ക് കോവിഡ് പോസിറ്റീവ് ആയിരുന്നെന്നും തങ്ങള് രണ്ടുപേരും ഇപ്പോഴും ക്വാറന്റീനില് തുടരുകയാണെന്നും വിപിന് പറഞ്ഞു. സുഖം പ്രാപിച്ചാല് കോവിഡ് പ്രതിരോധ പ്രവര്ത്തനങ്ങളില് വ്യാപൃതരാകാന് തയ്യാറാണെന്നും വിപിന് അറിയിച്ചു.
പ്രധാനമന്ത്രി ജസീന്ത ആര്ഡന്റെ നടപടികള് കോവിഡ് വ്യാപനത്തെ പിടിച്ചുകെട്ടുന്നതില് നിര്ണായകമായെന്ന് ന്യൂസിലന്ഡില് ജോലിചെയ്യുന്ന അനു രാഗ്നാഥ് അഭിപ്രായപ്പെട്ടു. അവരുടെ കഠിന പ്രവര്ത്തനവും ശക്തമായ നിലപാടുമാണ് നിയന്ത്രണം സാധ്യമാക്കിയത്- അനു കൂട്ടിച്ചേര്ത്തു. ആളുകള് മരിച്ചു വീഴാന് തുടങ്ങിയപ്പോഴാണ് ഇതൊരു സാധാരണ പനിയല്ലെന്ന ഗൗരവം ലോകം മുഴുവന് ഉള്ക്കൊണ്ടതെന്ന് നരേന്ദ്ര സിങ് ചൂണ്ടിക്കാട്ടി.
