കൊല്ലം: പത്തനാപുരം താലൂക്ക് ആശുപത്രിയില് ഡോക്ടര്ക്ക് മര്ദനം. രോഗിയുടെ ഒപ്പം വന്ന ആളാണ് ഡോക്ടറെ മര്ദിച്ചത്. പ്രതി പിടവൂര് സ്വദേശി രാജേഷിനെ അറസ്റ്റ് ചെയ്തു. ഇന്നലെ വൈകീട്ടാണ് സംഭവം. അസിസ്റ്റന്റ് സര്ജ്ജന് അനീഷ് പി ജോര്ജ്ജിനാണ് മര്ദനമേറ്റത്. അപകടത്തില് പരിക്കേറ്റ രോഗിക്കൊപ്പം എത്തിയ ആളാണ് കയ്യേറ്റം ചെയ്തത്. ഡോക്ടറുടെ മുഖത്തടിച്ച ഇയാള് ഡ്യൂട്ടിയിലുണ്ടായിരുന്നു നഴ്സിനെയും പിടിച്ചു തളളി. ഇയാള് മദ്യപിച്ചിരുന്നതായി ആശുപത്രി അധികൃതര് പറഞ്ഞു. മര്ദനത്തിന് ഇരയായ ഡോക്ടര് കൊട്ടാരക്കര താലൂക്ക് ആശുപത്രിയില് ചികില്സയിലാണ്. ഡോക്ടറുടെ പരാതിയില് കേസെടുത്ത പത്തനാപുരം പോലീസ് പിടവൂര് സ്വദേശി രാജേഷിനെ കസ്റ്റഡിയില് എടുത്തു. സംഭവത്തില് പ്രതിഷേധിക്കുന്നതായി കെ.ജി.എം.ഒ.എ ജില്ലാ പ്രസിഡന്റ് ഡോക്ടര് എന്.ആര് റീന അറിയിച്ചു.
