ഡല്ഹി : സ്ത്രീധന പീഡനത്തിന് ഒരു കുടുംബത്തിലെ എല്ലാവരെയും പ്രതികളായി കാണാന് കഴിയില്ലെന്ന് തീസ് ഹസാരി കോടതിയുടെ നിരീക്ഷണം. അതല്ലെങ്കില് പരാതി സാധൂകരിക്കുന്ന വിധത്തിലുള്ള വ്യക്തമായ തെളിവുകള് നല്കേണ്ടി വരുമെന്ന് കോടതി വ്യക്തമാക്കി. കുടുംബത്തിലെ എല്ലാ ചെറിയ തര്ക്കങ്ങളെയും പീഡനമായി വിശേഷിപ്പിക്കാനാവില്ലെന്നും കോടതി വ്യക്തമാക്കി. സ്ത്രീധന പീഡനക്കേസില് യുവതിയുടെ ആരോപണവിധേയയായ അമ്മായിഅമ്മയെ വെറുതെവിട്ടുകൊണ്ടാണ് കോടതി ഈ സുപ്രധാന നിരീക്ഷണം നടത്തിയത്.
സ്ത്രീധന പീഡന നിയമം കൊണ്ടുവന്നത് ഭര്തൃവീട്ടിലെ പീഡനത്തില് നിന്ന് സ്ത്രീയെ സംരക്ഷിക്കാന് വേണ്ടിയാണെന്ന് തീസ് ഹസാരി കോടതി അഡീഷണല് സെഷന്സ് ജഡ്ജി സഞ്ജീവ് കുമാര് വിധിന്യായത്തില് വ്യക്തമാക്കി.ചാന്ദ്നി ചൗക്ക് പ്രദേശത്ത് താമസിക്കുന്ന സ്ത്രീ നാല് വര്ഷം മുമ്പ് ഭര്ത്താവിനും അമ്മായിയമ്മയ്ക്കും എതിരെ സ്ത്രീധന പീഡനത്തിനും ക്രിമിനല് വിശ്വാസ വഞ്ചനയ്ക്കും കേസ് നല്കിയിരുന്നു. തുടര്ന്ന് പ്രതികള് കീഴ്ക്കോടതി വിധിയെ ചോദ്യം ചെയ്ത് മേല്ക്കോടതിയെ സമീപിക്കുകയായിരുന്നു. കീഴ്ക്കോടതിയുടെ വിധിയാണ് സെഷന്സ് കോടതി റദ്ദാക്കിയത്.
