തിരുവല്ല : മലങ്കര മാർത്തോമ്മാ സുറിയാനി സഭാധ്യക്ഷൻ ജോസഫ് മാർത്തോമ്മാ മെത്രാപ്പോലിത്തായുടെ നവതി ആഘോഷപരിപാടികളുടെ ഉദ്ഘാടനം പ്രധാനമന്ത്രി നരേന്ദ്ര മോഡി നാളെ നിര്വഹിക്കും. രാവിലെ 11 മണിക്ക് തിരുവല്ല സഭാ ആസ്ഥാനത്ത് നടക്കുന്ന പരിപാടി വീഡിയോ കോൺഫറൻസിലൂടെയാണ് പ്രധാനമന്ത്രി ഉദ്ഘാടനം ചെയ്യുന്നത്. ഡോ .അലക്സാണ്ടർ മാർത്തോമ്മാ വലിയ മെത്രാപ്പോലിത്താ സ്മാരക ഓഡിറ്റോറിയത്തിൽ കോവിഡ് പ്രോട്ടോകോളനുസരിച്ച് ലളിതമായ പരിപാടികളാണ് നടക്കുക.
കർദ്ദിനാൾ മാർ ബസേലിയോസ് ക്ലിമിസ് കാതോലിക്കാ ബാവ , ഡോ. ഗീവർഗിസ് മാർ തിയഡോഷ്യസ് , ചർച്ച് ഓഫ് സൗത്ത് ഇന്ത്യ മുൻ മോഡറേറ്റർ ബിഷപ്പ് തോമസ് കെ . ഉമ്മൻ , മലങ്കര ഓർത്തഡോക്സ് സുറിയാനി സഭാ നിരണം ഭദ്രാസനാധ്യക്ഷൻ യൂഹാനോൻ മാർ ക്രിസോസ്റ്റമോസ് മെത്രാപ്പോലിത്ത, യാക്കോബായ സുറിയാനി സഭാ മെത്രാപ്പോലിത്തൻ ട്രസ്റ്റി ഡോ. ജോസഫ് മാർ ഗ്രിഗോറിയോസ് മെത്രാപ്പോലിത്താ , രാജ്യസഭാ മുൻ ഉപാധ്യക്ഷൻ പ്രൊഫ . പി . ജെ.കുര്യൻ , ഡോ . ഉഷ ടൈറ്റസ് . എസ് , അക്കീരമൺ കാളിദാസ ഭട്ടതിരി , സലീം സക്കാഫി മൗലവി , സഭാ സെക്രട്ടറി റവ . കെ . ജി . ജോസഫ് എന്നിവർ പങ്കെടുക്കും. വൈദിക ട്രസ്റ്റി റവ . തോമസ് സി . അലക്സാണ്ടർ , അത്മായ ട്രസ്റ്റി പി.പി. അച്ചൻകുഞ്ഞ് എന്നിവർ മംഗളപത്ര സമർപ്പണം നടത്തും . രാവിലെ 8 മണിക്ക് തിരുവല്ല പൂലാത്തീൻ ചാപ്പലിൽ സ്തോത്രശുശ്രൂഷയും വിശുദ്ധ കുർബ്ബാനയും നടക്കും.
