ഹരിപ്പാട് : കുഞ്ഞു മക്കളെ സുരക്ഷിതമാക്കി സ്റ്റിയറിംങിലേയ്ക്ക് കുഴഞ്ഞ് വീണ രമേശന് മരണത്തിന് കീഴടങ്ങി. സ്കൂള് ബസ് ഓടിക്കവേ കടുത്ത നെഞ്ചുവേദന അനുഭവപ്പെട്ട ഡ്രൈവര് ബസ് റോഡ് സൈഡില് ഒതുക്കി നിര്ത്തിയതിന് പിന്നാലെ കുഴഞ്ഞു വീണു. പിന്നീട് ആശുപത്രിയില് മരണത്തിനു കീഴടങ്ങി. മിനി ബസിന്റെ ഡ്രൈവര് കരുവാറ്റ കാട്ടില് കിഴക്കതില് രമേശന് (60) മിനി ബസിലുണ്ടായിരുന്ന 12 കുട്ടികളുടെയും സുരക്ഷ ഉറപ്പാക്കിയ ശേഷം മരണത്തിലേക്ക് യാത്രയായത്.
മിനി ബസ് ദേശീയപാതയില് കരുവാറ്റ വട്ടമുക്കില് നിന്ന് എസ്എന് കടവിലെത്തി കുട്ടികളെ കയറ്റി മടങ്ങിയതിന് പിന്നാലെയാണ് സംഭവം. നെഞ്ചുവേദന അനുഭവപ്പെട്ട രമേശന് പെട്ടെന്നു വണ്ടി റോഡിന്റെ വശത്തേക്ക് ഒതുക്കി നിര്ത്തി. പിന്നാലെ സീറ്റില് ചരിഞ്ഞു വീണു. ബസിലെ ആയ വിജയലക്ഷ്മി കുലുക്കി വിളിച്ചെങ്കിലും അനക്കമുണ്ടായില്ല. രമേശന്റെ ശരീരമാകെ വിയര്ത്തിരുന്നു. തുടര്ന്ന് അവര് പുറത്തിറങ്ങി ബഹളം വച്ച് നാട്ടുകാരുടെ സഹായത്തോടെ കാറില് ഹരിപ്പാട് താലൂക്ക് ആശുപത്രിയില് എത്തിച്ചു. പക്ഷേ, രമേശന്റെ ജീവന് രക്ഷിക്കാനായില്ല.
ഹൃദയാഘാതമാണ് മരണകാരണമെന്നു ഡോക്ടര്മാര് പറഞ്ഞു. രണ്ടു വശത്തും പാടങ്ങളുള്ള ഭാഗത്തു വച്ചാണ് രമേശന് കുഴഞ്ഞുവീണത്. ബസ് നിര്ത്തിയില്ലെങ്കില് നിയന്ത്രണം വിട്ട് പാടത്തേക്ക് മറിയാന് സാധ്യത ഏറെയാണ്. ഷീജയാണ് രമേശന്റെ ഭാര്യ. മക്കള്: രഞ്ജിത്, ആദിത്യ. മരുമകള്: ജ്യോതി.