പത്തനംതിട്ട: ലഹരിവിരുദ്ധ കാമ്പയിന്റെ ഭാഗമായി ജില്ലാ പോലീസ് മേധാവിയുടെ നിര്ദേശപ്രകാരം ജില്ലയില് വ്യാപകമായി നടത്തിയ റെയ്ഡില് നിരോധിത പുകയില ഉല്പ്പന്നങ്ങള് പിടികൂടി. അഞ്ചു പേരെ അറസ്റ്റ് ചെയ്തു. ജില്ലാ ഡാന്സാഫ് നോഡല് ഓഫീസര് നാര്കോട്ടിക് സെല് ഡിവൈ.എസ്.പി കെ.എ.വിദ്യാധരന്റെ മേല്നോട്ടത്തിലായിരുന്നു പരിശോധന. വിവിധ സ്റ്റേഷന് പരിധിയിലെ കടകളും മറ്റും കേന്ദ്രീകരിച്ച് നടന്ന പരിശോധനയില് അതത് പോലീസ് സ്റ്റേഷനിലെ ഉദ്യോഗസ്ഥരും പങ്കെടുത്തു. അടൂര് ടൗണില് മുറുക്കാന് കട നടത്തുന്ന കരുവാറ്റ തുളസിവിളാകം വീട്ടില് മുരളീധരനുണ്ണിത്താ (51) നില് നിന്നും 75 പാക്കറ്റ് വിവിധയിനം നിരോധിത പുകയില ഉല്പ്പന്നങ്ങള് പിടിച്ചെടുത്തു.
പോത്രാട് ജങ്ഷന് സമീപം ഉള്ള കൊടുമണ് ഐക്കാട് സ്വദേശി ദേവിവിലാസം വീട്ടില് സുമേഷി(42)ന്റെ പലചരക്ക് കടയില് നിന്നും 47പാക്കറ്റുകളാണ് കണ്ടെടുത്തത്. തിരുവല്ല പെരിങ്ങര പാതിരുവേലില് സുമേഷ് സോമന് നടത്തുന്ന കുരിശുകവലയ്ക്ക് സമീപമുള്ള സ്റ്റേഷനറി കടയില് നിന്ന് 25 പാക്കറ്റുകള് പിടികൂടി. മനക്കച്ചിറ ജങ്ഷന് സമീപമുള്ള വള്ളംകുളം കടുത്തേതറ കെ.സി.തോമസിന്റെ മകന് എബ്രഹാം തോമസിന്റെ പെട്ടിക്കടയില് നിന്ന് അഞ്ചു പായ്ക്കറ്റും പന്തളം കടയ്ക്കാട് ആദില് മന്സില് ദുല്ക്കര് റാവുത്തരുടെ മകന് നടത്തുന്ന ഉണക്കമീനും പച്ചക്കറിയും വില്ക്കുന്ന കടയില് നിന്ന് ശംഭു ഇനത്തില്പ്പെട്ട നിരോധിത പുകയില ഉല്പ്പന്നങ്ങളും പിടിച്ചെടുത്തു. എസ്.ഐ അജി സാമൂവലിന്റെ നേതൃത്വത്തിലുള്ള ഡാന്സാഫ് സംഘം പലതായി തിരിഞ്ഞാണ് പരിശോധന നടത്തിയത്.
