കൊച്ചി : മദ്യലഹരിയിലുണ്ടായ വാക്കുതർക്കത്തെ തുടർന്ന് ഒപ്പം താമസിച്ചിരുന്ന യുവാവിനെ കുത്തിക്കൊന്ന വിവിധഭാഷ തൊഴിലാളി പിടിയിൽ. മൂവാറ്റുപുഴയിൽ കഴിഞ്ഞ ദിവസം വൈകിട്ടായിരുന്നു സംഭവം. പശ്ചിമ ബംഗാൾ സ്വദേശി റെക്കിബുൾ (31) എന്നയാളാണ് മരിച്ചത്. ഇയാൾക്കൊപ്പം താമസിച്ചിരുന്ന സുഹൃത്ത് നിജാമുദ്ദീൻ മിയ (34)യാണ് പിടിയിലായത്.
മൂവാറ്റുപുഴയിൽ സ്വകാര്യ വ്യക്തിയുടെ വീട്ടിൽ വാടകയ്ക്ക് താമസിച്ച് വരികയായിരുന്നു ഇരുവരും. ഇന്നലെ ഇരുവരും മദ്യപിക്കുന്നതിനിടെ വാക്കുതർക്കം ഉണ്ടാവുകയായിരുന്നു. ഇതിനിടെയാണ് സുഹൃത്തിനെ നിജാമുദ്ദീൻ കുത്തിയത്. ഒപ്പം താമസിക്കുന്ന മറ്റുള്ളവർ റെക്കിബുള്ളിനെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ഇടത് നെഞ്ചിൽ വാരിയെല്ലുകൾക്കിടയിൽ ആഴത്തിലുള്ള മുറിവുണ്ടെന്ന് ഡോക്ടർമാർ പറയുന്നു.
