തിരുവനന്തപുരം : സംഘര്ഷം സൃഷ്ടിക്കാന് ബോധപൂര്വമായ ശ്രമങ്ങളാണ് ബി ജെ പി യുടെ ഭാഗത്ത് നിന്ന് ഉണ്ടായത് എന്ന് എല് ഡി എഫ് കണ്വീനര് ഇ പി ജയരാജന്. അതിന് എല്ലാ പിന്ന്തുണയും യു ഡി എഫ് നല്കുന്നു.കഷ്ടകാലത്തിന് ഇവിടെ ബി ജെ പിക്ക് 35 കൗണ്സിലര്മാര് ഉണ്ടായി അതിന്റെതാണ് ഇപ്പോള് അനുഭവിക്കുന്നത്. ആര് എസ് എസ് ന്റെ ഇത്തരം നീക്കങ്ങള്ക്കെതിരെ ജനങ്ങളെ അണിനിരത്തി പ്രതിഷേധിക്കുമെന്നും ഇത്തരം ആര് എസ് എസ് വര്ഗ്ഗീയ വാദികളുടെ ലക്ഷ്യം കലാപമാണ്, ഇത്തരത്തിലെ അക്രമണങ്ങളില് പ്രകോപനങ്ങളില് വീണു പോവരുത് എന്നും അദ്ദേഹം പറഞ്ഞു.
അക്രമം നടത്താന് വേണ്ടി പ്രവര്ത്തിക്കുന്ന പാര്ട്ടിയാണ് ബിജെപിയും ആര് എസ് എസ്സും. സമാധാനപരമായ അന്തരീക്ഷം തകര്ക്കാനുള്ള ബോധപൂര്വമായ ആര്എസ്എസ് ശ്രമം ആണ് ഇവിടെ നടക്കുന്നത്. ആരെങ്കിലും പുറത്തിറങ്ങിയാല് അവരെ അക്രമിക്കാനുള്ള ലക്ഷ്യവും ഉണ്ടായിരുന്നു എന്നും ഇ പി ജയരാജന് പറഞ്ഞു.
അതോടൊപ്പം നഗരത്തിന്റെ വികസനം തകര്ക്കാനുള്ള ശ്രമം ആണ് ആര് എസ് എസ് നടത്തുന്നത്. ഇന്നലെ നടന്ന ആക്രമണവും ആസൂത്രിതമായ അക്രമം ആണ്. തുടര്ച്ചയായി സി പി എം ഓഫീസുകള്ക്ക് നേരെ ആക്രമണം ഉണ്ടാകുന്നു. ഈ അക്രമങ്ങളില് പാര്ട്ടി സഖാക്കള് പ്രകോപിതരാകരുത്. ആര്എസ്എസ് ലക്ഷ്യം കലാപമാണ്. അക്രമത്തില് അപലപിക്കുന്നു എന്നും അദ്ദേഹം കൂട്ടിച്ചേര്ത്തു.
