ഉത്തരകാശി: ഉത്തരാഖണ്ഡിലെ ഉത്തരകാശിയില് റിക്ടര് സ്കെയിലില് 3.1 തീവ്രതയിൽ ഭൂചലനം രേഖപ്പെടുത്തി. തിങ്കളാഴ്ച പുലര്ച്ചെ 1:50 ഓടെയാണ് ഭൂചലനം അനുഭവപ്പെട്ടത്. നാഷണല് സെന്റര് ഫോര് സീസ്മോളജിയാണ് വിവരം ട്വിറ്ററിലൂടെ പങ്കുവെച്ചത്. ഉത്തരകാശിയില് നിന്ന് 24 കിലോമീറ്റര് കിഴക്ക്-തെക്കായി 5 കിലോമീറ്റര് ആഴത്തില് തെഹ്രി ഗര്വാള് ജില്ലയിലാണ് ഭൂകമ്പത്തിന്റെ പ്രഭവകേന്ദ്രം. ആളപായമൊന്നും റിപ്പോര്ട്ട് ചെയ്തിട്ടില്ല.
ഇക്കഴിഞ്ഞ നവംബര് 9 ന് തെഹ്രി മേഖലയില് 4.5 തീവ്രതയിൽ ഭൂചലനം അനുഭവപ്പെട്ടിരുന്നു. കഴിഞ്ഞ ദശകത്തില് 700 ചെറിയ ഭൂകമ്പങ്ങളാണ് ഉത്തരാഖണ്ഡില് മാത്രം ഉണ്ടായത്. ഇന്നും ഭൂചലനം അനുഭവപ്പെട്ടതോടെ മലയോര സംസ്ഥാനത്തുള്ള ജനങ്ങള് ആശങ്കയിലാണ്. ലോകത്തിലെ ഭൂകമ്പ സാധ്യത പ്രദേശങ്ങളില് മുന്നിലാണ് ഹിമാലയന് പ്രദേശങ്ങള്. ഹിമാലയന് ബെല്റ്റില് വലിയ ഭൂചലനങ്ങള്ക്കുള്ള സാധ്യതയുണ്ടെന്ന് വിദഗ്ധര് മുന്നറിയിപ്പ് നല്കിയിരുന്നു.
