ഗാസിയാബാദ് : കള്ളപ്പണം വെളുപ്പിക്കല് കേസുമായി ബന്ധപ്പെട്ട് മാധ്യമപ്രവര്ത്തക റാണ അയുബിനെതിരെ ഇ ഡി കുറ്റപത്രം സമര്പ്പിച്ചു. ഗാസിയാബാദ് കോടതിയിലാണ് കുറ്റപത്രം നല്കിയത്. ചാരിറ്റിയുടെ മറവില് ജനങ്ങളില് നിന്നും ഓണ്ലൈന് പ്ലാറ്റ്ഫോമിലൂടെ നിയമവിരുദ്ധമായി പണം സമാഹരിച്ചു എന്നാണ് കേസ്. സന്നദ്ധ പ്രവര്ത്തനങ്ങള്ക്കായി സംഭാവനകളിലൂടെ സമാഹരിച്ച പണം സ്വന്തം ആവശ്യത്തിനായി ഉപയോഗിച്ചുവെന്ന് ആരോപിച്ചാണ് എന്ഫോഴ്സമെന്റ് ഡയറക്ടറേറ്റ് റാണ അയൂബിനെതിരെ നടപടി എടുത്തത്. നേരത്തെ റാണാ അയ്യൂബിന് ഇ ഡി യാത്രാ വിലക്ക് ഏര്പ്പെടുത്തിയിരുന്നു. തുടര്ന്ന് എന്ഫോഴ്സ്മെന്റ് ഡയറക്ടറേറ്റിന്റെ നടപടി ചോദ്യം ചെയ്ത് റാണ അയ്യൂബ് ഡല്ഹി ഹൈക്കോടതിയെ സമീപിച്ചു. ഇഡി ഏര്പ്പെടുത്തിയ യാത്രാ വിലക്ക് കോടതി റദ്ദാക്കുകയും ചെയ്തിരുന്നു.
