തിരുവനന്തപുരം : പിണറായി വിജയന്റെ മകൾ വീണ വിജയനുമായി ബന്ധപ്പെട്ട ഇഡി അന്വേഷണത്തിലും അതിനെതിരെ സിപിഎം നടത്തുന്ന പ്രതിഷേധങ്ങളിലും രൂക്ഷ വിമർശനവുമായി കോൺഗ്രസ് നേതാവ് കെ. മുരളീധരൻ. പിണറായിയുടെ മകളെ സംരക്ഷിക്കാനാണ് സിപിഎം പ്രവർത്തകർ തെരുവിൽ ഇറങ്ങുന്നതെന്നും, ഈ പ്രതിഷേധം പിണറായി വിജയനോടുള്ള സ്നേഹം കൊണ്ടല്ലെന്നും അദ്ദേഹം പറഞ്ഞു. കേന്ദ്ര ഏജൻസിയായ ഇഡിയുടെ നടപടികളോട് കോൺഗ്രസിന് പൂർണ്ണ യോജിപ്പില്ലെന്നും ഇഡിയെ തങ്ങൾക്ക് അത്ര വലിയ വിശ്വാസമില്ലെന്നും അദ്ദേഹം വ്യക്തമാക്കി. ഇഡിയുടെ അന്വേഷണത്തെ തങ്ങൾ അത്ര ഗൗരവമായി കാണുന്നില്ലെന്നും അദ്ദേഹം പറഞ്ഞു.
പിണറായിയുടെ മകളെ സംരക്ഷിക്കാൻ പാർട്ടി വാർത്താ സമ്മേളനം വിളിക്കുന്നതും പ്രവർത്തകർ തെരുവിൽ ഇറങ്ങുന്നതും എന്തിനാണെന്ന് അദ്ദേഹം ചോദിച്ചു. പിണറായി വിജയനെ പാർട്ടി മീറ്റിംഗുകളിൽ ചീത്ത വിളിക്കുന്നവരാണ് ഇപ്പോൾ തെരുവിൽ ഇറങ്ങിയിരിക്കുന്നതെന്നും, സർക്കാർ സ്ഥാപനങ്ങൾ നശിപ്പിക്കാനുള്ള ദുഷ്ടബുദ്ധിയാണ് ഇതിന് പിന്നിലെന്നും അദ്ദേഹം ആരോപിച്ചു.
