തിരുവനന്തപുരം: പരിസ്ഥിതി ആഘാത വിലയിരുത്തല് (ഇ.ഐ.എ) 2020 കരട് വിജ്ഞാപനം കേന്ദ്ര സര്ക്കാര് പിന്വലിക്കണമെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്. ഇക്കാര്യം ആവശ്യപ്പെട്ട് പ്രധാനമന്ത്രി നരേന്ദ്ര മോദിക്കും കേന്ദ്ര പരിസ്ഥിതി മന്ത്രി പ്രകാശ് ജാവദേക്കര്ക്കും കാനം കത്തയച്ചു. നിയമഭഭേദഗതി ചെയ്യാനുള്ള നീക്കത്തില് നിന്ന് കേന്ദ്ര സര്ക്കാര് പിന്മാറണമെന്ന് കത്തില് ആവശ്യപ്പെടുന്നു.
പരിസ്ഥിതി ആഘാത വിലയിരുത്തല് എന്ന നിലവിലെ പരിസ്ഥിതി ചട്ടങ്ങളെ ദുര്ബലപ്പെടുത്തുന്ന സാഹചര്യം സൃഷ്ടിക്കും. പരിസ്ഥിതി സംരക്ഷണം കൂടുതല് ശക്തിപ്പെടുത്തേണ്ട സാഹചര്യമാണ് നിലവിലുള്ളത്. കോര്പറേറ്റുകളെ സഹായിക്കുന്ന നീക്കത്തില് നിന്ന് കേന്ദ്ര സര്ക്കാര് പിന്മാറണമെന്നും കാനം ആവശ്യപ്പെടുന്നു.
പരിസ്ഥിതിക്ക് ആഘാതമുണ്ടാക്കുമോ എന്ന പരിശോധന കൂടാതെ നിക്ഷേപം നടത്താന് സാധിക്കുന്നതാണ് പുതിയ വിജ്ഞാപനം. ഭാവിയില് ഇത് രാജ്യത്തിന് ഗുണകരമാവില്ല. പുതിയ വിജ്ഞാപനത്തില് കൂടുതല് പിഴവുകളുണ്ടെന്നും കത്തില് ചൂണ്ടിക്കാട്ടുന്നു.
പരിസ്ഥിതി ആഘാത വിലയിരുത്തല് (ഇ.ഐ.എ.) 2020 കരട് വിജ്ഞാപനത്തില് പൊതുജനങ്ങള്ക്ക് അഭിപ്രായങ്ങളും നിര്ദ്ദേശങ്ങളും അറിയിക്കാനുള്ള അവസരം ഇന്ന് അവസാനിക്കാനിരിക്കെ പുതിയ നിയമത്തിന്റെ കരടില് പ്രതിഷേധം ശക്തമാണ്. നിയമത്തോട് വിയോജിപ്പ് അറിയിച്ചു കൊണ്ട് പൊതുജനങ്ങളുടെ നാലര ലക്ഷത്തിലധികം കത്തുകളാണ് പരിസ്ഥിതി മന്ത്രാലയത്തിന് കിട്ടിയത്.
പ്രകൃതി ദുരന്തങ്ങള് ആവര്ത്തിക്കുന്ന സാഹചര്യത്തില് അതിനെയെല്ലാം തൃണവല്ഗണിച്ചു കൊണ്ടുള്ള കേന്ദ്ര സര്ക്കാരിന്റെ നടപടി വലിയ ആപത്ത് ക്ഷണിച്ചു വരുത്തുമെന്നാണ് പ്രതിഷേധക്കാരുടെ അഭിപ്രായം. ഡല്ഹിയില് പരിസ്ഥിതി മന്ത്രാലയത്തിന് മുന്നില് ഇ.ഐ.എ ഭേദഗതിക്കെതിരെ ചുവരെഴുത്തുകളും പ്രത്യക്ഷപ്പെട്ടു. തീരുമാനം പിന്വലിക്കണമെന്ന് ആവശ്യപ്പെട്ട് നാഷണല് ബില്ഡേഴ്സ് അസോസിയേഷനും പരിസ്ഥിതി മന്ത്രിക്ക് കത്ത് നല്കിയുട്ടുണ്ട്.
